Prezidente Comissão Nacional de Eleição (CNE), José Agostinho da Costa Belo,. Imajen TATOLI/Antonio ‘Dasiparu’ Gonçalves.

DILI, 28 janeiru 2021 (TATOLI)—Prezidente Comissão Nacional de Eleição (CNE), José Agostinho da Costa Belo, hateten molok atu realiza eleisaun prezidensiál 2022 CNE hamutuk ho Sekretária Estadu Arte no Kultura (SEAK) sei realiza serimónia kulturál hodi husu matak malirin ba bei’ala sira iha eleisaun prezidensiál. 

Notísia Relevante: Tribunál Rekursu simu lista kandidatura PR to’o 04 fevereiru

“Ha’u ko’alia ona ho Sekretáriu Estadu Arte Kultura, Teófilo Caldas, ita sei promove ita-nia  konseitu  eleisaun ho  situasaun demokrásia  moderna maibé ita sei konjuga ita-nia kultura,” Prezidente  CNE hateten ba  jornalista sira hafain hala’o sorumutu ho autoriadade lokál iha munisípiu Dili, iha Salaun CNE, Laline Lariguto, sesta ne’e.

Nia fó hanoin, prosesu demokrasia iha nasaun estranjeiru hanesan iha Portugal no rai seluk, bainhira realiza kampaña sei hasoru malu de’it iha otél hodi debate, maibé atu hala’o kampaña ne’e timor-oan presiza realiza uluk serimónia kultura hodi husu matak malirin ba be’ala sira.

“Ita timor-oan, ita-tenke realiza uluk kultura hodi husu matak malirin bainhira ita halo promesa, nune’e kandidatura sira hala’o kampaña ho di’ak liután,” nia hateten.

Atu realiza Serimoñia rituál refere, CNE sei koordena ho SEAK, hodi realiza serimónia kulturál ne’e iha munisípiu sira hotu iha territóriu nasionál hafoin sei mai konsentra iha nasionál hodi asina paktu unidade nasionál mak kandidatura Prezidente Repúblika sira hala’o kampaña eleitorál.

Hafoin lia-nain sira realiza rituál iha munisípiu sira no sei lori sira konsentra iha nasionál hodi kontinua realiza serimónia rituál iha ambitu atu realiza eleisaun prezidensiál ne’ebé sei hahú iha loron 19 fulan-marsu ne’e.

“Serimonia rituál ne’e sei realiza iha munisípiu no nasionál nune’e ita nia kandidatu hamutuk iha ne’e, paktu ita kaer metin ita nia estadu hanesan mós nasaun tenke asegura lei maibé asegura mós kultura. Eleisaun la’o di’ak ita muda uitoan paktu ho kultura hodi fó di’ak ba ita-nia kandidatu no ita vota mós la’o di’ak hodi fó ita-nia votu,” nia dehan.

Sekretáriu Estadu Arte no Kultura (SEAK), Teófilo Caldas, hateten Sekretáriu Estadu Arte no Kultura prontu hamutuk ho CNE hodi realiza semonia kulturál antes realiza eleisaun prezidensiál 2022 ba Prezidente Repúblika periodu 2022-2027.

“Ohin Prezidente CNE husu mai ha’u katak ita mobiliza ita-nia lia-nain sira hosi munisípiu sira hodi realiza serimónia rituál, atu realiza eleisaun la’o iha ambiente ida pás (hakmatek) no labele iha konflitu hodi estraga ita-nia situasaun,” nia dehan.

Eleisaun prezidensiál povu deside nia vida no nasaun, nune’e Prezidente Repúblika bele lori nasaun ne’e ba oin no lori povu ba moris di’ak.

“Rituál ne’e baibain ita halo tiha ona maib’e ida-ne’e foin mak primeira vez SEAK hamutuk ho CNE realiza serimónia rituál. Baibain Governu mak organiza hanesan realiza serimónia rituál kona-ba satan pandemia COVID-19,” nia hateten.

Bazea ba kalendáriu ne’ebé mak Prezidente Repúblika aprova eleisaun prezidensiál sei realiza iha loron 19 fulan marsu tinan ne’e no daudaun ne’e kandidatura na’in-lima (5) mak rejista ona iha tribunál rekursu mak hanesan José Manuel Ramos Horta, Angela Freitas, Milena Pires, Felisberto Araujo no Armanda Berta dos Santos (sei kompleta dokumentu).

Notísia Relevante: Kandidatu Ramos Horta rejista ona iha Tribunál Rekursu

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here