Inundasaun neebe akontese dia 4 Abril 2021 iha Raikotu. Imajen Tatoli/Antonio Goncalves

DILI, 27 janeiru 2022 (TATOLI) – Governu liuhosi Sekretaria Estadu Protesaun Sivíl (SEPS) hamutuk ho parseiru dezenvolvimentu sira iha tinan 2022 ne’e sei agresivu liután fornsese informasaun ba komunidade kona-ba prevensaun dezastre naturál.

Sekretáriu Estadu Protesaun Sivíl Joaquim Gusmão, esplika, bazea ba relatóriu hosi UNDP kona-ba gastu publiku alterasaun klimátika iha Timor-Leste fó-sai rekomendasaun atu hasa’e tán gastu publiku prevensaun dezastre natúral nune’e sai referénsia ba SEPS atu kria polítika no programa relasiona ho prevensaun dezaste naturál.

“Ita hamutuk ho parseiru dezenvolvimentu sira-ne’ebé iha inklui ita-nia diresaun nasionál rasik sempre iha formasaun no diseminasaun informasaun ba komunidade iha munisípiu sira-ne’ebé mak hela iha fatin risku dezastre. Maibé presiza agresivu liután ba parte mitigasaun, adaptasaun no prevensaun dezastre,” Joaquim Gusmão informa ba Ajénsia Tatoli iha Hotel Timor, Dili, kinta ne’e.

SEPS serbisu hamutuk ho Sekretaria Estadu Ambiente (SEA) no UNDP asesu ba fundu green climate fund ne’ebé implementa ona projetu harii infraestrutura inklui uma ne’ebé reziliente ba dezastre, nune’e bele hahú redus gastu bainhira akontese dezastre.

Timor-Leste mobiliza millaun $71 hosi fundu internasionál

Timor-Leste mobiliza ona fundu internasionál hosi fonte rua hanesan fundu klimátika verde hamutuk millaun $55 no fundu globál ambientál facility hamutuk millaun $16 no sei aumentu tán millaun $16 iha 2022, nune’e totál hamutuk hosi fonte rua besik millaun $80-resin.

Fundu hirak-ne’e dadaun ne’e hahú implementa hamutuk projetu 130 hanesan infraestrutura iha área rurál liuhosi projeitu estrada, irrigasaun, kanalizasaun bee-mos no esgotu.

Projetu 130 ne’e implementa ona iha munisípiu neen hanesan Baucau, Lautem, Viqueque ,Aileu, Ermera no Liquiçá hamutuk millaun $55, ne’ebé define iha Ministériu Admistrasaun Estatál (MAE) liuhosi Programa Nasionál Dezenvolvementu Suku (PNDS) no Ministériu Agrikultura no Peska (MAP) kona-ba reflorestasaun nian.

SEPS liuhosi fundu refere utuliza ba atividade redús dezastre naturál hanesan instala sistema alerta sedu iha mota-ulun Maloa, Komoro no Bekora nune’e fó atensaun ba komunidade molok akontese dezastre naturál.

Nune’e mós SEPS sei kompleta tán Bombeiru iha munisípiu tolu hanesan Liquiçá, Ermera no Manatuto.

“Daudaun ne’e totál rekursu iha protesaun sivíl 2.400, ba oin ita sei aumenta tán pesóal iha diresaun nasionál risku no dezastre naturál, liuliu ba iha munisípiu sira,” Joaquim hateten.

“Timor ne’e kuaze tinan-tinan sempre hasoru dezastre iha teritóriu tomak maibé ita-nia ekipa preparadu,” Joaquim argumenta.

SEPS mós hahú aplika Lei Protesaun Sivíl númeru 12/2020, 02 dezembru hafoin entrada vigór no sei instala tán autoridade protesaun sivíl hafoin konsellu ministru aprova iha tinan 2021 nune’e faslita liután serbisu Governu nian.

Lei refere atu kriminaliza komunidade ne’ebé harii uma iha fatin risku dezastre, liuliu iha mota ninin, foho-lolon, tasi-ninin no lagoa.

Lei Protesaun Sivíl kompostu hosi kapítulu hitu, hanesan kapítulu I kona-ba despozisaun jerál, kapítulu II situasaun alerta, kontinjénsia no klamidade, kapítulu III diresaun no koordenasaun polítika protesaun sivíl, kapítulu IV estrutura ezekutiva protesaun sivíl, kapitulu V operasaun protesaun sivíl, kapítulu VI forsa defeza no seguransa no kapítulu VII despozisaun finál ho totál artigu 59.

Notisia relevante: Governu prioritiza alterasaun klimátika hodi atinje ekonomia sustentável

Jornalista     : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here