DILI, 27 janeiru 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, informa, rekursu umanu ne’ebé prepara hahú hosi pré-eskolár hanesan investimentu hodi garante kualidade edukasaun iha futuru.
Prezidente Autoridade RAEOA, hahú halo inaugurasaun ba Eskola Pré-Eskolár (EPE) Atoni Ambeno, iha suku Costa, sub-rejiaun Pante Makasar iha loron 25 janeiru ne’e.
“Ha’u kontente, tanba tinan kotuk RAEOA estabelese eskola hamutuk 14 iha sub-rejiaun haat, ha’u hakarak tinan tolu oin mai ita aumenta tán edifísiu ba eskola sira, fasilidade eskola iha suku no aldeia, liuliu pré-eskolár nian, tán ne’e hanesan investimentu rekursu umanu ba futuru,” Arsénio Paixão Bano ba Agência Tatoli, liuhosi telefónika, kinta ne’e.
Nia fó-sai katak, Oé-Cusse iha aldeia hamutuk 63, minimál tenke estabelese tán fasilidade edukasuan hanesan pré-eskolár iha aldeia sira, ne’ebé populasaun barak tanba dadaun ne’e foin maka harii 14, entaun iha Oé-Cusse sentru tenke aumenta pré-eskolár barak tanba komunidade aumenta beibeik presiza kria kondisaun ba labarik sira.
Sekretária Rejionál ba Asuntu Edukasaun Solidariedade Sosiál no Inkluzaun, Avelina da Costa, informa, estabelese pré-eskolár ne’e bazea ba planu estratéjiku edukasaun nian, tanba prepara rekursu ne’ebé di’ak hahú hosi pr’e-eskolár maka hakat ba ensinu báziku.
“Tanba bainhira tama iha ensinu báziku gratuitu obrigatóriu no universál ba ema hotu ho idade tinan-neen (6), iha klase nono-anu, primeiru tenke aprende dahuluk iha pré-eskolár, minimál tinan-rua (2), tan ne’e fasialidade ne’e serbí duni ba inisíu tinan fiskál 2022, oan sira iha ona fatin natoon tuir regulamentu kurríkulu pré-eskolár nian,” nia katak.
Xefe suku Costa, Aleixo Abi, agradese ba autoridade RAEOA tanba maske iha situasaun COVID-19, maibé tau konsiderasaun nafatin ba fasilidade edukasaun, nune’e fasilita oan sira ne’ebé idade sei minoridade atu hahú integra-aan hosi asesu edukasaun ho fatin ne’ebé dignu.
Entretantu, projetu ne’e ezekuta hosi empreza Elbenito Unipesoál, Lda, ho valór kontratu $$73.332.45, ne’ebé aloka hosi Orsamentu Jerál Estadu (OJE) 2021, hodi konstrui fasilidade sala aula-rua (2), sala profesór ida (1) kompleta ho hariis-fatin no kanalizasaun bee-moos.
Purtantu, iha tinan 2021 autoridade RAEOA liuhosi Sekretaria Rejionál ba Asuntu Edukasaun Solidariedade Sosiál no Inkluzaun, aloka osan hamutuk millaun $1-resin ($1,048,66.41) hosi Orsamentu Jerál Estadu (OJE) 2021 hodi konstrui eskola unidade 14 iha teritóriu Oé-Cusse.
Notisia relevante: http://www.tatoli.tl/2021/07/28/autoridade-raeoa-aloka-millaun-1-resin-ba-projetu-kontrusaun-eskola-14/
Jornalista : Abílio Elo Nini
Editór : Evaristo Soares Martins