Prezidente Repúblika, Francisco Guterres Lú Olo, Prezide Reuniaun Superior de Defesa no Segurança (CSDS), iha Palásiu Prezidente Nicolau Lobato, Bairru Pite, Dili, kinta, (27/01). Imajen Tatoli /Egas Cristovão

DILI, 27 janeiru 2022 (TATOLI)—Prezidente Repúblika, Francisco Guterres Lú Olo, hahú estuda kona-ba pedidu ezonerasaun ba Xefe Estadu Maiór Jenerál FALINTIL-Forsa Defesa Timor Leste (F-FDTL),Tenente Jenerál, Lere Anan Timur, no mós kargu Xefia F-FDTL foun durante lidera enkontru Konsellu Superiór Defeza no Seguransa (KSDS).

Xefe Casa Militár Prezidensia Repúblika, Coronel, António Soares da Silva ‘Maukalu’, hateten iha reuniaun ne’e diskute pontu haat importante.

Notísia Relevante:Lere foti lisensa hodi hein PR dekreta pedidu reforma

Dahuluk, aprova akta reuniaun anteriór, daruak, ko’alia kona-ba pedidu ezonerasaun xefia militár.

Datoluk, diskute kona-ba nomeasaun Xefia militár no dahaat mak  nomeasaun ba promosaun Jenerál.

“Sira hanesan membru KSDS nia funsaun hanesan órgaun konsulta Prezidente Repúblika nian no kuandu órgaun konsulta ne’e la’ós desizaun maibé mai atu analiza no estuda kona-ba asuntu saida mak trata hodi fó hanoin,” Nia hateten iha Palasiu Prezidensiál Bairu-Pité Dili, kinta ne’e.

Nia dehan, Xefe Estadu rona ona opiniaun husi Membru Konsellu Superiór Defeza no Seguransa (KSDS) hotu-hotu no agora sei estuda no análize hela pedidu ne’e, molok foti desizaun hodi dekreta iha Jornál da Repúblika iha tempu besik.

Durante diskusaun kona-ba pedidu ezonerasaun,  Tenente Jenerál, Lere Anan Timur la admite atu partisipa iha diskusaun ne’e.

Entertantu, tuir observasaun Agência Tatoli.I.P, nota enkontru ne’e hahú tuku 09:30 Otl no termina iha tuku 14:30 otl.

Enkontru KSDS iha kinta ne’e, partisipa husi Prezidente Repúblika, Francisco Guterres Lú-Olo, Primeiru-Ministru, Taur Matan Ruak, Ministru Defeza, Filomeno Paixão de Jesus, Tenente Jenerál, Lere Anan Timur, Komandante Jerál PNTL, Komisáriu Faustino da Costa, Deputadu David Dias Ximenes, Deputadu Abel Pires, José Manuel ‘Nakfilak’, Vise Ministru Justisa, José Edmundo Caetano no seluk tan.

Antes ne’e, Governu liuhosi desizaun koletiva Konsellu Ministru (KM), iha loron 21 fulan-janeiru 2022, aprova proposta ezonerasaun no nomeasaun ba kargu xefia FALINTIL-Forsa Defeza Timor-Leste (F-FDTL).

Aleinde ne’e, proposta ne’e inklui ezonera Majór Jenerál Falur Rate Laek, hosi Kargu Vise-Xefe Estadu Maiór Jenerál Forsa Armada no nomesaun Majór Jenerál Falur Rate Laek, ba Kargu Xefe Estadu Maiór Jenerál Forsa Armada, nomesaun Brigadeiru Jenerál Calisto dos Santos Coli ‘Coliati’, ba Kargu Vise-Xefe Estadu Maiór Jenerál Forsa Armada.

Nune’e mós, mantein nomeasaun Komodoru Pedro Klamar Fuik, ba Kargu Xefe Estadu Maiór Forsa Armada.

Tenente Jenerál Lere Anan Timur lidera F-FDTL durante tinan ha’at hahú 2015 to’o 2019, hafoin prolonga ka estende tan to’o ohin loron.

Notísia Relevante:Governu aprova proposta ezonerasaun no nomeasaun kargu xefia F-FDTL

Jornalista: Nelson de Sousa

Editór: Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here