UKL iha suku Uma Quic ne’ebé finaliza ona. Imajen/Espesiál

DILI, 27 janeiru 2022 (TATOLI)–Konstrusaun Uma Kbiit Laek (UKL) tolu iha aldeia Aidak-bem, suku Uma Quic, postu administrativu Viqueque villa, munisípiu Viqueque daudaun finaliza ona 100%.

“Ami halo koordenasaun ho ekipa Planu Nasionál Dezenvolvimentu Suku (PNDS), maibé seidauk deside data fixa ba inaugurasaun. Enkuantu, iha loron 10 outubru 2021 parte inspesaun jerál tun halo inspesaun ba UKL,” Xefe suku Uma Quic, Hermigildo Rangel, hateten ba Agência TATOLI, via telefónika, kinta ne’e.

Notísia relevante: Progresu konstrusaun UKL Viqueque atinje 70%

Tuir autoridade suku ne’e, uma ho kualidade di’ak tebes, tanba ne’e nia parte husu benifisiáriu na’in-tolu atu kuidadu ho di’ak.

Benefisiáriu UKL tolu iha suku Uma Quic maka hanesan  Agusto Soares, Bendita Amaral no Ana Maria Gomes.

Fasilidade ne’ebé PNDS tau ona iha UKL laran maka hanesan kama, meza, kadeira, balde, sanan no armáriu.

Nune’e mós, Diretór PNDS munisípiu Viqueque, Higinio Pozinato e Silva, hateten, tanba konstrusaun ramata ona maka ekipa hatama ona fasilidade ba uma-laran no tau mós parabola inklui televizaun.

“Tanba ne’e maka fois lalais ami halo diskusaun ho nasionál kona-ba orsamentu ba konstrusaun UKL iha foho no villa. Tanba distribuisaun materiál konstrusaun ba suku ne’ebé dook hanesan suku Nahareka ne’e kustu atu transporta materiál karun, maibé iha Viqueque villa kustu operasionál tun kada uma ida ninia osan $14.000 to’o $17.000.

Tuir dadus UKL iha postu administrativu sira, postu Viqueque villa iha suku 10 benefisia UKL hamutuk 30, postu Ossu iha suku 10 benefisia UKL 30, postu Lacluta iha suku haat benefisia UKL 12, postu Uatulari iha suku neen benefisia UKL 18, suku Uatucarbau iha suku neen benefisia UKL 18, nune’e totál UKL iha Viqueque hamutuk 108.

Governu aloka orsamentu millaun $25 ba konstrusaun UKL hamutuk 1.254 iha suku 424 munisípiu 12 la inklui Rejiaun Administrativa Espesiál Oé-cusse Ambeno (RAEOA).

Uma ne’ebé konstrui kompostu hosi tipu ka medida rua, tipu 48m2 ne’ebé inklui kuartu tolu, sala vizita ida no dapur, tipu 37 m2 ne’ebé sei inklui kuartu rua, kompletu ho sala vizita ho dapur.

Benefisiáriu UKL iha munisípiu Aileu 99, Ainaro 62, Baucau 177, Bobonaro 150, Covalima 90, Dili 24 de’it tanba postu administrativu Ataúro ho Metinaro mak hetan, Ermera 156, Lautém 102, Liquiçá 69, Manatuto 93, Manufahi 86 no Viqueque 108.

UKL hanesan programa VIII Governu Konstitusionál PNDS atu fó tratamentu dignu ba sidadaun, ne’ebé ezekutivu estabelese kritériu ba banefisáriu sira hanesan ema vunerável ka ema ne’ebé kbiit laek, idozu ona, kondisaun uma rezistente a’at no iha rendimentu mínimu.

Governu konsidera UKL nu’udar programa ne’ebé ninia orientasaun atu kria kondisaun komunidade kbiit laek sira iha nível aldeia, ne’ebé korresponde ho Planu Estratéjiku Dezenvolvimentu Nasionál (PEDN) 2011-2030, ne’ebé rekoñese povu Timor-Leste nia aspirasaun atu harii nasaun ne’ebé forte, prósperu no moris di’ak.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here