Grupu responsável konstrusaun hahú sobu Eskola Cabira-Oan iha Viqueque. Imajen/Espesiál

DILI, 27 janeiru 2022 (TATOLI)–Diretór Servisu Edukasaun Munisípiu sira simu ona orientasaun hosi Diresaun Nasionál Dezenvolvimentu Parque Eskolár (DNDPE) hodi hahú ona prosesu projetu komunitáriu ba konstrusaun sala aula 651 iha eskola 197 iha territóriu nasionál, hahú ho fundu 25% iha faze dahuluk.

“Ita-nia konstrusaun ba eskola 10 hahú ona, agora falta eskola ualu maka seidauk tanba razaun dalan ladi’ak no distánsia dook. Projetu komunitáriu sei hahú ho faze haat, faze dahuluk hahú daudaun ona no fundu ba kada faze 25% to’o kompleta faze dahaat,” Diretór Edukasaun Munisípiu Viqueque, Emídio Amaral ba Agência TATOLI, via telefónika, kinta ne’e.

Notísia relevante: Eskola 17 iha Viqueque tama projetu komunitáriu hadi’a sala aula

Totál orsamentu ba eskola 17 ho sala aula 48 iha munisípiu Viqueque  hamutuk $1.668.575,18.

Nune’e mós, Diretora Servisu Edukasaun Aileu, Cristalina da Conceição Soares, relata, dadus eskola iha munisípiu Aileu ne’ebé tama iha projetu komunitáriu hamutuk 13, ba sala aula 40.

Totál projetu 13 ne’e ninia orsamentu mai hosi Ministériu Edukasaun Juventude no Desportu (MEJD), hosi verba transferénsia públika no ba eskola ida ninia orsamentu mai hosi fundu infraestrutura no kapitál dezenvolvimentu.

Projetu ba eskola ida hosi fundu kapitál dezenvolvimentu ne’e, liu konkursu ne’ebé MEJD rasik mak responsabiliza.

“Projetu ne’e implementa ona hosi empreza Aileu-oan ida mak manan no daudaun ba eskola 13 ne’e hanesan projetu komunitáriu,” Cristalina da Conceição akresenta.

Diretór Servisu Edukasaun Bobonaro, Crispin Martins, relata, iha sala aula 76 iha eskola 21 maka tama iha projetu komunitáriu, ne’ebé hahú loron 28 janeiru sei realiza seremónia tau fatuk dahuluk iha eskola EBC Batu-Aben.

“Ami-nia sala aula 76 iha eskola 21 sei gasta osan hamutuk $2.409.512,03, maibé ami sei la foti dala-ida, bainhira atu realiza maka foin foti 25% tuir faze to’o remata,” nia dehan.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here