Estudante Sekundariu Jerál 04 setembru, UNAMET, Dili. Imajen TATOLI/Dok.

DILI, 27 janeiru 2022 (TATOLI)–Ministériu Edukasaun Juventude no Desportu (MEJD) liuhosi Diretór Servisu Edukasaun Dili (DSED) orienta ona Inspetór Eskolár halo investigasaun ba dirijente eskola ne’ebé ninia estudante hala’o prátika arte-marsiál no asaun la edukativu seluk iha momentu simu rezultadu ezame nasionál.

“Parte edukasaun ninia haree, asaun sira ne’e la eziste no labele tolera, tanba eskola nu’udar fatin atu eduka alunu sai ema. Ne’e duni estudante finalista ne’ebé hatudu ona jestu arte-marsiál no uza kamiza la edukativu iha eskola ne’e hanesan hahalok laiha morál,” Diretór Servisu Edukasaun Dili, Carlito da Silva, hateten ba Agência TATOLI, iha ninia knaar fatin, kinta ne’e.

Tuir nia, regra eskola bandu labele aplika asaun sira ne’e, tanba durante ne’e estudante sira simu matéria morál.

”Tinan-tolu rona rezultadu maka pasa hotu, ne’e ami-nia susesu, ne’ebé kuandu estudante ida mak aplika fali buat seluk ne’e liga ona ba in-disiplinár,” nia akresenta.

Regra eskola klaru katak estudante hotu tenke uza farda, tama ho oras, respeita profesór sira no tenke hakru’uk ba eskola.

Nune’e, parte MEJD no DSED daudaun ne’e hein hela rezultadu inspesaun no investigasaun hosi inspetór sira tanba konsidera hanesan preokupasaun públiku no Parlamentu Nasionál.

“Ami-nia diresaun husu ona ba inspetór atu buka hatene eskola ne’ebé maka ninia estudante finalista sira halo asaun sira, atubele identifika tanba Parlamentu Nasionál mós ko’alia ona atu trava diploma no kastigu saida mak atu fó ba sira. Tanba ne’e ami buka hela solusaun,” Diretór ne’e tenik.

Nune’e mós, Ministru Edukasaun Juventude no Desportu, Armindo Maia, hateten, parte ministériu simu ona informasaun no daudaun ne’e halo ona asaun ruma ba eskola sira hodi haree medida saida mak atu aplika tanba asaun ne’ebé estudante finalista sira halo sei iha areadór eskola.

“Ha’u labele fó komentáriu ba ida-ne’e tanba iha relasaun ho ema-nia direitu, maibé hahalok sira ne’e sai matéria ka input ida mai ami. Maibé atu dehan de’it durante ne’e ita iha ona regulamentu kona-ba buat sira ne’e hodi regula estudante,” nia dehan.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here