Sekertáriu Jerál Partidu FRETILIN, Mari Alkatiri. Imajen TATOLI/Francisco Sony

DILI, 27 janeiru 2022 (TATOLI)—Sekretáriu Jerál Partidu Frente Revolucionária de Timor-Leste Independente (FRETILIN), Marí Alkatiri, hateten, kona-ba kandidatu Prezidente Repúblika (PR) hosi partidu atu kompete iha eleisaun, la presiza liuhosi konferénsia nasionál tanba estatutu partidu fó dalan.

“FRETILIN nia estatutu klaru, Prezidente partidu mak primeiru kandidatu ba Prezidente Repúblika, tanba ne’e la presiza konferénsia nasionál,” Alkatiri hateten iha Komité Sentrál FRETILIN (CCF, sigla portugés), kinta ne’e

Sekretáriu Jerál hato’o lia hirak ne’e hodi hatan ba preokupasaun públiku ne’ebé kestiona kandidatura atuál Prezidente Partidu FRETELIN, Francisco Guterres ‘Lú Olo’, ba Prezidente Repúblika períodu 2022-2027, sein liu konferénsia nasionál.

Notísia relevante: Kontinua kompete iha eleisaun prezidensiál, Lú Olo sei luta hasoru injustisa no kontra KKN

Nune’e, iha sesta (28/01),  Sekretáriu Jerál sei konvoka reuniaun atu reafirma apoia ba kandidatu Lú Olo.

“Aban ha’u konvoka reuniaun Komisaun Polítika Nasionál atu hetan informasaun, liuliu mai dala-ida tan reafirma FRETILIN nia apoia ba kandidatu Francisco Guterres ‘Lú Olo’. Ne’e apoia FRETILIN nian hosi leten mai to’o kraik, mákina partidu tomak sei fó apoia, tanba kandidatu Lú Olo nia agora hanesan Prezidente, tanba uluk kandidatu FRETILIN, nia sai Prezidente ona ho vizaun nasionál no agora nia rasik hakarak kandidata-an hanesan Prezidente, tanba ne’e obrigasaun FRETILIN nian atu fó apoia ba nia,” nia dehan.

Tuir Alkatiri, la’ós la gosta ho kandidatu seluk, maibé Lú Olo iha vizaun inkluziva durante sai hanesan Xefe Estadu no hakarak kontinua ho programa sira atu hametin Estadu, nune’e bele kontribui ba dezenvolvimentu sustentável.

Antes ne’e, Francisco Guterres ‘Lú Olo’ ofisialmente deklara ona iha munisípiu Ermera, katak sei kandida-an ba kompete iha eleisaun Prezidensiál iha marsu 2022.

Bazeia ba estatutu Partidu FRETILIN, iha artigu 83 kona-ba kargu polítiku, mensiona katak Prezidente Partidu hanesan kandidatu FRETILIN ba kargu Prezidente Repúblika no Sekretáriu Jerál hanesan kandidatu ba Primeiru-Ministru.

Mensiona mós katak, bainhira Prezidente no Sekretáriu Jerál la disponível ba funsaun rua ne’e mak sei aprezenta ba Komité Sentrál FRETILIN atu indika membru seluk para ezerse kargu ne’e.

Hafoin restaurasaun independénsia iha 20 maiu 2002, Francisco Guterres ‘Lú Olo’ eleitu hanesan Prezidente Repúblika ba períodu 2017 to’o 2022.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here