Diretór Ezekutivu ADTL, Cesário da Silva. Imajen Tatoli/Egas Cristovão.

DILI, 27 janeiru 2022 (TATOLI)–Diretór Ezekutivu Asosiasaun Defisiénsia Timor-Leste (ADTL), Cesário da Silva, husu Governu liuhosi Ministériu Edukasaun Juventude no Desportu tenke aselera kurríkulu ba ensinu rekorrente ba ensinu sekundáriu, tanba estudante barak mak akaba ona nia eskola primária no atu kontinua ba iha nivél sekundáriu inklui ho ema ho defisiénsia sira.

Notísia Relevante: MEJD halo preparasaun elabora kurríkulu rekorrente ensinu sekundáriu

“Ami-nia espetasaun kurríkulu ba ensinu rekorente nian iha nível sekundáriu ne’e importante tebes no presiza duni kurríkulu ne’e atu integra mós iha asuntu defisiente nian, tan ne’e Governu tenke aselera no implementa kurrúkulu iha tinan ne’e tanba ema barak mak ramata ona no kontinua ba nível sekundáriu,” Diretór Ezekutivu ADTL ne’e hateten Agência TATOLI, liuhosi telefónika, kinta ne’e.

Se laiha kurríkulu entaun seidauk iha programa espesífiku ba ema ho defisiénsia sira bele tuir ezame ekivalénsia iha nível sekundáriu nian iha Timor-Leste, entaun situasaun sira-ne’e sai referénsia di’ak.

Tanba, tuir nia, iha tinan hirak ba kotuk ne’e Asosiasaun Defisiénsia Timor-Leste (ADTL)  tenke lori estudante ekivalénsia sira iha nível sekundáriu ba tuir ezame iha Kupang iha Nusa Tenggara Timur (NTT).

Notísia Relevante: Akadémiku konsidera presiza ekipa méritu elabora kurríkulu ensinu rekorrente ba sekundáriu

“Ha’u hanoin tempu ona Governu hahú hanoin no planu hodi introdús kurríkulu foun atu dekreta dekretu ministeriál atu aprova ba ezame ensinu rekorrente iha nível sekundáriu sira, nune’e ema ho defisiénsia mós hola parte,” nia hateten.

Pertinente tebes atu iha kurríkulu ne’e hodi bele asegura maluk defisiénsia sira atu kontinua ba nível universitáriu, maibé loloos ne’e MEJD implementa ona ensinu rekorrente nível sekundária.

Diretór Ezekutivu Asosiasaun Halibur Matan Timor-Leste (AHDMTL), Gaspar Afonso, hatutan MEJD foin elabora ne’e bainhira tanba estudante ema ho defisiénsia sira barak mak ramata ona no atu hakat ba nível sekundáriu ona.

“Tanba ami ema ho defisiénsia matan na’in-20-resin mak ramata iha nível primária ona atu kontinua fali iha sekundáriu, nune’e Governu presiza aselera tanba ita tauk mak sira preokupa fali kampaña eleitorál ba eleisaun prezidensiál entaun sei la tau prioridade ona,” Gaspar hateten.

Dadus Ema ho Defisiénsia (EhD) iha Timor-Leste hamutuk 38.118 maibé hosi númeru ne’e ema ho defisiénsia matan hamutuk 14.828, ema ho difisiénsia tilun 12.000-resin, ema difisiénsia mobilidade ka motora 7000-resin, difisiénsia psikolojia intelektuál ema no hamutuk 3000-resin.

Notísia Relevante: ADTL apoia inisiativa DNER atu elabora kurríkulu Ensinu Sekundáriu

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here