Jornalista Lusa, António Sampaio, uja faru metan no atual Prezidente Konsellu Administrasaun RTTL, E.P, José António Belo ‘Taraleu’. presta deklarasaun iha Tribunal Distrital ba publikasaun dokumentu kazu Topo Honis. Loron kuarta (26/01). Imajen Tatoli/Francisco Sony

DILI, 26 janeiru 2022 (TATOLI)— Tribunál Distritál Dili (TDD), kuarta ne’e, kontinua hala’o julgamentu ba públikasaun relatóriu ne’ebé diskonfia envolve eis-Diretór Komisaun Justisa no Pás (KJP) Dioseze Dili, arguidu Padre Hermínio Fátima Gonçalves no arguidu na’in-tolu seluk.

Iha julgamentu ne’e, Tribunál aprezenta sasin nain-rua hanesan António Sampaio, jornalista Ajénsia Notisioza Portugés LUSA no José António Belo, eis-jornalista Tempo Timor (TT).

Notísia relevante:  TDD rona deklarasaun Xanana ba publikasaun relatóriu KJP

Iha sala audénsia, jornalista LUSA, António Sampaio rekoñese halo duni notísia kona-ba relatóriu komisaun Justisa no Pás, Dioseze Dili, maibé fonte mai hosi dokumentu ka relatóriu ne’e rasik no Prokuradór Jerál Repúblika.

Jornalista Lusa, António Sampaio. Imajen Tatoli/Francisco Sony

“Ha’u halo notísia ne’e ho baze ba dokumentu ka relatóriu ne’e, tanba ha’u konfirma ona relatóriu ne’e nia verasidade no loos inklui mai hosi fonte kredivél. Maibé ha’u sei la sita fonte ne’ebé maka fó relatóriu ne’e mai ha’u, tanba tuir etíka profisionál jornalista labele mensiona fonte nia naran, nune’e ha’u hili fonte maka relatóriu ne’e rasik,” sasin António deklara iha Tribunál Distritál Dili (TDD).

Iha biban hanesan, sasin José Antonio Belo deklara, hafoin asesu relatóriu ne’e, tenta halo konfirmasaun ba parte KJP hodi haree verasidade ba dokumentu ne’e no konsege ba dala rua, maibé laiha resposta.

Tanba ne’e, nia dehan hahú halo rezumu ba relatóriu ne’e hodi públika, tanba dokumentu ka relatóriu ne’e interesante liga ba kondenadu Richard Dashback no asuntu interesante barak ne’ebé relatóriu ne’e sita.

Prezidente Konsellu Administrasaun RTTL, E.P, José António Belo ‘Taraleu’. Imajen Tatoli/Francisco Sony

“Ha’u labele fó sai fonte ne’ebé maka fó relatoriu ne’e ba ha’u tanba ha’u kumpre lei sira liuliu kona-ba segredu profisionál labele públika fonte, hafoin públika ami atu kontinua halo notisia, maibé dioseze husu deskulpa ami mós la halo ona notísia,” Jose Belo hateten.

Hafoin rona sasin na’in rua, tribunál adia julgamentu ne’e ba loron seluk hodi kontinua rona sasin seluk.

Audénsia julgamentu ne’e prezide husi juíz singular Evangelinho Belo, MP reprezenta prokuradór Matias Soares no arguidu sira hetan asisténsia legál hosi advogadu privadu Miguel Acasio Faria, no advogada privada madre na’in-rua.

Notísia relevante:  Jornalista sei la fó-sai ema-ne’ebé fornese dokumentu

Jornalista : Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here