DILI, 26 janeiru 2022 (TATOLI)— Xefe Estadu Maiór Jenerál FALINTIL-Forsa Defeza Timor-Leste (F-FDTL), Tanente Jenerál Lere Anan Timur, informa, iha tempu badak sei anúnsia nia kandidatura hodi kompete iha eleisaun prezidensiál, ne’ebé sei realiza iha 19 marsu tinan ne’e.
“Ha’u seidauk dehan katak bainhira mak atu deklara-an, tanba iha loron 4 fevereiru hotu ona,maibé ha’u hanoin katak imi lalika husu ida ne’e, kuandu to’o tempu deklara ne’e ha’u deklara ona. Sé kuandu ha’u la deklara entaun la avansa ona,” Tanente Jenerál Lere Anan Timur, hateten hafoin enkontru ho Xefe Estadu Francisco Guterres Lú-Olo iha Palasiu Prezidensiál Bairru-Pité, kuarta ohin.
Nia dehan, atu anúnsia ba nia-kandidatura tanba iha duni apoia solidaridade, mai hosi rezisténsia Armada, organizasaun Klandestina, Juventude-sira, ne’ebé hahú kria kondisaun atubele ba rejista iha Tribunál Rekursu.
Nune’e, Tenente Jenerál dehan, nia parte husu duni lisensa hodi hala’o atividade sivíl, hodi hein pedidu reforma dekreta hosi Prezidente Repúblika.
“Ha’u foin daudaun ne’e lisensa atu ba deskansa hodi hakiak manu, hakiak fahi iha Metinaro,” nia akresenta.
Lere kongratula Horta
Entretantu, Tenente Jenerál Lere Anan Timur hato’o parabéns ba José Ramos Horta ne’ebé hetan fiar hosi Xanana Gusmão hodi kandidata-an Prezidente Repúblika hodi kompete iha eleisaun prezidensiál.
“Primeiru, ha’u fó ha’u nia parabéns ba Maun Ramos Horta, no furak kuandu manu-aman rua hamutuk, mais furak liután, pelus menus líder sira ne’ebé fó an ba ukun-an ne’e hamutuk furak tebetebes. Ha’u nia maun boot Xanana ha’u nia maun boot Ramos Horta, no ha’u nia maun boot María Alkatiri, no depois ami sira ne’e iha kotuk, hamutuk furak tebes tebes ba rai Timór ida ne’e” Lere akresenta.
Tuir nian, ba líder rezisténsia sira ne’e la difisil atu sai Prezidente Repúblika, maibé importante mós tenke ko’alia kona-ba problema nasionál ne’ebé daudaun ne’e sai preokupasaun bo’ot.
“Ita hamutuk buat hotu hotu sai di’ak, ohin loron ita iha problema nasionál, la’ós problema institusionál, problema kona-ba ita nia mina, ne’ebé ita nia direitu, ko’alia kona-ba soberania, fronteira ho Austrália,” nia afirma.
Tanba, Lere dehan, konfiansa ne’ebé Xanana Gusmão fó ba José Ramos Horta furak liu mak líder nasionál sira hamutuk.
“Ha’u fó parabéns partikularmente ba maun Xanana, ha’u nia aman sarani kazamentu, tanba nia fó konfiansa ba maun Ramos Horta, maibé ha’u dehan ladún furak líder sira uluk sira hamutuk trasa nasaun ne’e nia distiñu, inklui mós ami veteranu sira, liuliu kuadru médiu, ha’u membru komite sentrál FRETILIN no komandante sira seluk ho Jenerál sira no kuadru médiu, biar mate barak mais sira bele lori balun mai hamutuk ho sira nain tolu no haat ne’e, nia enkoraja.
Notísia relevante: Kandidata an ba PR, Lere submete ona karta reforma ba Governu
Jornalista: Natalino Costa
Editór: Florencio Miranda Ximenes
