Inspetór Jerál no Prezidente Komisaun Monitorizasaun no Fiskalizasaun ba Implementasaun Medida Sosio-Ekonomia MESSK, Higino Alves. Imajen Tatoli/Francisco Sony

DILI, 26 janeiru 2022 (TATOLI)—Ministériu Ensinu Superiór Siénsia no Kultura (MESSK) identifika dezentendimentu iha tinan kotuk kona-ba relatóriu ezekusaun pagamentu propina ba estudante hamutuk 64.466, ne’ebé Ensinu Superiór Públiku privadu (IESPP) 18 relata la tuir formatu ne’ebé ministériu nia hakarak.

“Ho esperiénsia ne’ebé iha, pagamentu etapa daruak ne’e ministériu hahú kria formatu foun no sosialiaza, atu relata pagamentu faze daruak hosi estudante hosi IESPP 18 bele tuir formatu ida de’it,” Inspetór Jerál no Prezidente Komisaun Monitorizasaun no Fiskalizasaun ba Implementasaun Medida Sosio-Ekonomia, Higino Alves, hateten iha salaun enkontru Colmera, kuarta ne’e.

Tuir Inspetór Jerál, pagamentu izensaun propina ba semestre in-par halo hotu ona no agora hahú tama ba pagamentu semestre par, nune’e molok halo pagamentu, ministériu sei konvoka enkontru ida ho reprezentante universidade inklui tékniku elaborasaun relatóriu sira atubele hetan informasaun kona-ba regulamentu prosesu pagamentu inklui uniformiza relatóriu.

“Antes ne’e mosu ona problema, iha estudante balun mak mate maibé sira-nia lista kontinua tama nafatin no estudante balun sira-nia proposta inisiál kona-ba valór ho pagamentu la hanesan,” nia akresenta.

Maski nune’e, parte ministériu sei esforsu buka atu hadi’a fallansu sira, nune’e bainhira realiza pagamentu daruak iha semester par no elaborasaun relatóriu laiha ona problema.

Notísia relevante: MF realiza pagamentu inzensaun propina faze daruak ba estudante 66.106

Vise-Reitór Universidade Nasionál Timor-Leste (UNTL) ne’ebé trata asuntu Administrasaun Finansa, Helder Xavier, apresia sosializasaun ne’ebé MESSK halo ona.

“Tinan kotuk la konsege halo ida-ne’e, entaun mosu kauza lubuk ida kona-ba dezentendimentu ho relatóriu la’o la tuir formatu ka regra ne’ebé ministériu hakarak tanba laiha formatu klaru atu haruka ba kada Instituisaun Ensinu Superiór atu halo tuir,” nia dehan.

Enkuantu, UNTL iha estudante hamutuk 27.000-resin, entaun iha momentu ne’ebá difísil tebes atu ajusta tuir formatu ne’ebé MESSK hakarak.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here