Estudante iha eskola Ensinu Sekundáriu Jerál, Dom Martinho da Costa Lopes (DMCL), Maliana, hala’o hela limpeza, hodi prepara ba ezame periúdu daruak, kinta (22/07/21). Imajen Tatoli/Sérgio da Cruz.

BOBONARO, 26 janeiru 2022 (TATOLI) – Ensinu Sekundária Jerál (ESG, sigla portugés) númeru 1, Dom Martinho da Costa Lopez  (DMCL), Maliana, simu de’it estudante foun na’in-450 iha tinan letivu 2022 tanba sala aula la sufisiente.

Diretór Servisu Edukasaun Munisipál Bobonaro, Crispim Moniz, hateten, problema menus sala aula difikulta Eskola Sekundária Jerál (ESG, sigla portugés) númeru 1, Dom Martinho da Costa Lopez  (DMCL), Maliana, atu akumula estudante ho kuantidade boot.

Desizaun ne’e parte eskola foti bazea ba sirkulár Ministériu Edukasaun, Juventude no Despórtu (MEJD) númeru 01/MEJD/1/2021 ne’ebe deskreve katak eskola hotu iha teritóriu laran tomak akumula de’it estudante na’in-45 kada turma.

Nune’e mós labele halo kobransa ilegál ba estudante sira, la permite suku uniforme eskola arbiru. Bainhira eskola atu foti desizaun ruma tenke iha desizaun koletiva ho inan-aman sira, no sirkular ne’e mós orienta eskola hotu bele akumula de’it estudante 45 kada turma.

“Sira iha de’it vaga ba turma 10, entaun sé orientasaun mai kada turma ne’e 45 de’it, signifika sira bele simu de’it 450 alunu tanba sira iha limitasaun sala aula nomoos profesór, sé bainhira sira simu liuhosi ida-ne’e estudante sira labele hetan edukasaun ne’ebé másimu,” nia ko’alia iha Bairru Maravilla, Maliana, tersa ne’e.

Tuir dadus ne’ebé iha totál sala aula iha eskola refere hamutuk 20. Hosi numeru ne’e mak durante ne’e utiliza hodi hala’o prosesu ensinu aprendizajen ba estudante husi désimu-anu to’o désimu segundu-anu.

“Sé ita sena de’it estudante barak iha aula ida sei fó  implikasaun boot, hanesan etu ida karik ita tein sei la tasak didi’ak, ita atu halo jestaun klase mós difisil tebes,” nia fó ezemplu.

Enkuantu dezde horseik 23 fulan-janeiru 2022 DMCL, Maliana loke prosesu rejistrasaun ba estudante foun, no  tuir dadus ne’ebé iha katak estudante na’in-300 mak halo ona rejistrasaun no sei falta vaga 150.

Jornalista         : Sérgio da Cruz

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here