DILI, 25 janeiru 2022 (TATOLI)—Diretór Klínika Hospitál Nasionál Guido Valadares (HNGV), Marcelino Correira, hateten Konsellu Diretivu HNGV la autoriza médiku sira fó reseita ba pasiente atu hola aimoruk iha klínika privadu sira.
“Ami laiha orientasaun atu médiku haruka pasiente ba hola aimoruk iha klínika privadu sira iha li’ur, maibé iha pesoál saúde individu balun mak haruka no ami buka hatene mak deteta fó xamada ba tanba la tuir ona orientasaun ne’ebé mak konsellu hasai iha HNGV ne’e,” Diretór Klínika HNGV ne’e hateten ba Jornalista sira iha knaar fatin-Bidaun, tersa ne’e.
Tanba, Tuir nia baihira aimoruk laiha médiku sira tenke kontaktu ba klínika HNGV atu buka maneira atu rezolve atu pasiente bele hetan aimoruk hodi konsumu ka hemu.
“Aimoruk laiha sira fó hatene ha’u atu kontaktu ba farmasia, bainhira aimoruk stock mamuk nia prosedura mak tenke halo komunikasaun ho SAMES. Bainhira SAMES dehan laiha sira tenke halo karta notifikasaun katak stock out duni. Nune’e ita kompra emerjénsia duni iha farmasia privadu sira, maibé ita kompra ho orsamentu Governu atu halo tratamentu pasiente sira. La’ós ita-nia pasiente mak hasai nia osan atu sosa aimoruk tanba ida ne’e laiha orientasaun,” nia fó hanoin ba médiku sira.
Iha fatin hanesan, Diretór Servisu Autónomu Medikamentu no Ekipamentu Saúde (SAMES), Santana Martins, hateten tuir prosedimentu ne’ebé iha bainhira aimoruk estoke laiha ne’e jestór sira tenke halo pedidu mai iha SAMES atu halo distribusaun.
“Kona-ba pesoál balun haruka pasiente hola aimoruk ne’e ami ladun hatene, maibé ami hatene mak reseita ne’e tenki fó ba pesoál farmasista sira tenki buka solusaun tanba aimoruk sira iha armazein SAMES tanba daudaun ne’e ita iha aimoruk item 495,” nia afirma.
Jornalista : Felicidade Ximenes
Editór : Florencio Miranda Ximenes
