Grupu juventude mileniál deklara apoia kandidatu Prezidente Repúblika, José Ramos eleisaun prezidensiál. Imajen Tatoli/Abilio Elo Nini.

DILI, 26 janeiru 2022 (TATOLI) – Grupu juventude mileniál, hanesan estudante independente, ne’ebé durante ne’e la envolve iha organizasaun polítika, kuarte ne’e deklara sei apoia José Ramos Hosta hodi kompete iha eleisaun prezidensiál ne’ebé sei realiza iha 19 marsu.

“Ami juventude no estudante mileniál, nu’udar grupu juventude independente ne’ebé la inklina ba partidu polítiku ka organizasaun polítiku ruma, deklara apoiu totál ba kandidadtu Prezidente Repúblika períodu 2022-2027, nu’udar kandidatu independente ida, ne’ebé hetan mós apoiu hosi maun boot Kay Rala Xanana Gusmão no entidade barak iha nasaun Timor-Leste,” Portavós, Vitória Soares, reprezentante juventude mileniál, ko’alia iha Ai-mutin, Dili.

Razaun fundamentál ne’ebé juventude independente sira fó fiar, iha pontu lima (5) tanba tuir juventude meliniál sira nia observasaun, kandidatu José Ramos Horta, iha kapasidade atu sai aman no lidera nasaun ne’e ho pás no estabilidade.

Pontu dahuluk, kandidatu José Ramos Horta, iha kapasidade akumulativu, hodi hakuak lidér sira hotu, akumula lidér konstinuadór no jerasaun foun sira, nune’e bele hakotu impase polítiku iha rai-laran.

Pontu daruak, haree hosi pezu polítika, ne’ebé kandidatu José Ramos Horta iha, maka fiar katak bele rezolve problema interna, liuliu bele fó influénsia ba Governu hodi hadi’a ekonomia rai laran.

Pontu datoluk, kandidatu José Ramos Horta, iha kapasidade rezolve problema externa, kria relasaun di’ak ho nasaun sira iha mundu tomak, promove ekonomia Timor-Leste iha rai-li’ur no dada investidór internasionál sira, atu mai investe iha nasaun ne’e.

Pontu dahaat, Prezidente Repúblika nu’udar aman ba nasaun no símbolu unidade nasionál, grupu juventude ne’e konsidera kandidatu José Ramos Horta prienxe rekezitu sira-ne’e hotu.

Pontu ikusliu, juventude no estudante mileniál husu, atu inan-aman no juventude sira hotu iha teritóriu laran tomak, mai hamutuk lori hikas Horta asume hikas Prezidente Repúblika ba períodu 2022-2027.

Entretantu, iha loron 15 janeiru 2022 ne’e, atuál Prezidente Repúblika, Fransisco Guteres ‘Lú Olo’, dekreta ona kalendáriu eleisaun prezidensiál ba períodu 2022-2027, sei realiza iha loron 19 marsu tinan ne’e.

Purtantu, prazu aprezentasaun lista kandidatura ba Prezidente Repúblika loron efetivu, daudaun ne’e hela loron-sia (8), tanba tuir Tribunál Rekursu sei simu lista kandidatura Prezidente Repúblika to’o 04 ferereiru.

Maske nune’e daudaun ne’e Tribunál Rekursu seidauk simu lista kandidatura hodi kompete iha Eleisaun Prezidensiál 2022.

Jornalista         : Abílio Elo Nini
Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here