
DILI, 26 janeiru 2022 (TATOLI)–Governu liuhosi reuniaun Konsellu Ministru (KM), kuarta ne’e, aprova Proposta Rezolusaun Governu, ne’ebé aprezenta hosi Primeiru-Ministru (PM), Taur Matan Ruak, kona-ba nomeasaun Ageu Jorge Cardoso, nu’udar Diretór Ezekutivu Ajénsia Nasionál Planeamentu, Monitorizasaun no Avaliasaun (ANAPMA).
“Knaar ne’e iha rejime komisaun serbisu, ho durasaun tempu tinan haat,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu iha Palásiu Governu, kuarta ne’e.
Enkuantu, foin lalais KM aprova dekretu-lei hodi kria ANAPMA, nune’e ho aprovasaun diploma ne’e, Unidade Planeamentu, Monitorizasaun no Avaliasaun (UPMA), ne’ebé lidera hosi Koordenadora, Brígida Soares, halakon no subtitui ajénsia ne’e, hanesan serbisu administrasaun sentrál administrasaun direta Estadu ho autonomia administrativa no finanseira.
Notísia relevante: UPMA transforma ba ajénsia nasionál ho autonomia administrativa no finanseira
Nune’e, ajénsia nasionál ne’e iha responsabilidade atu organiza, koordena no superviziona prosedimentu no prosesu administrativu sira, ba planeamentu plurianuál, hosi médiu prazu no períodu tinan-lima inklui monitorizasaun no avaliasaun ba ninia implementasaun.
Jornalista : Antónia Gusmão
Editora : Julia Chatarina