Primeiru-Ministru, Taur Matan Ruak, prezide reuniaun Konsellu Ministru. Iha Palásiu Governu, kuarta (26/01). Imajen TATOLI/Francisco Sony

DILI, 26 janeiru 2022 (TATOLI)—Ekipa téknika lideradu hosi Vise Primeiru-Ministru asuntu infraestrutura no Ministru Planu no Ordementu (MPO), José Maria dos Reis, aprezenta pontu situasaun iha reuniaun Konsellu Ministru (KM), kuarta ne’e, kona-ba ezekusaun projetu sira ne’ebé finansia ho Fundu Infraestrutura (FI).

Ekipa téknika kompostu hosi Sekretariadu Grande Projetu (SGP) hosi servisu verifikasaun no inspesaun, ne’ebé realiza hosi Ajénsia Dezenvolvimentu Nasionál (ADN) no prosesu aprovizionamentu projetu hosi Fundu Infraestrutura, mak Komisaun Nasionál Aprovizionamentu (CNA, sigla portugés).

“Konsellu Ministru rona aprezentasaun hosi grupu servisu tékniku, kona-ba rezultadu prinsipál jestaun no ezekusaun Fundu Infraestrutura, no mós implementasaun projetu ne’ebé mosu tanba dezastre naturál iha loron 04 abríl 2021,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu, iha Palásiu Governu, kuarta ne’e.

Notísia relevante: Governu prevee millaun $332 ba fundu infraestrutura iha OJE 2022

Aleinde ne’e, ezekutivu sira analiza dezafiu prinsipál ne’ebé hasoru, hodi hamosu solusaun no rekomendasaun, nune’e bele hadi’a ezekusaun projetu ne’ebé finansia hosi fundu infraestrutura sira.

Nune’e mós, ekipa halo aprezentasaun kona-ba prosesu iha kontestu Fundu Infraestrutura kona-ba ezekusaun sira ne’ebé akontese ona durante tinan 2021 no haree oinsá atu hadi’a liután ritmu ezekusaun atubele prodús rezultadu iha setór infraestrutura.

“Konsellu Ministru halo diskusaun ba kestaun ne’e ho kle’an hodi simu mós rekomendasaun sira hosi membru Governu sira seluk, hodi nune’e bele informa liután kona-ba dezafiu saida de’it mak enfrenta ba ezekusaun Fundu Infraestrutura,” nia dehan.

Tanba ne’e, Governu tenke had’ia mekanizmu koordenasaun ba siklu projetu nia no haree fali mós asuntu legál ligadu ho prosedimentu sira atubele fasilita liután velosidade ezekusaun.

Alokasaun ba FI desde tinan 2011 to’o agora hamutuk bilian $5,1, ne’ebé ezekusaun atinje ona biliaun $3,2 ka 62% hosi totál, ne’ebé projetu 1.065 mak konklui ona no hosi projetu ne’e kria ona empregu ba ema 65.561.

Aleinde ne’e, iha projetu 330 mak ein kursu, projetu foun 236, projetu ne’ebé seidauk inisia hamutuk 242, no projetu 13 mak pendente.

Governu aloka $332.453.139 ba Fundu Infraestrutura iha tinan 2022, kompostu hosi saláriu no vensimentu $34.995, bens no servisu $940.865, kapitál menór $32.200, kapitál dezenvolvimentu $331.445.079 no transferénsia públika laiha no sei finansia programa 26, sub-programa 68 ho atividade 1.004.

Programa aproxima servisu Tribunál ba populasaun prevee $4.407.817, programa jestaun finansa públika prevee $3.030.000, programa kultura no patrimóniu $950.000.

Programa telekomunikasaun prevee $16.815.467, programa estrada no ponte prevee $164.495.443, programa dezenvolvimentu rurál no urbanu prevee $11.989.298, programa seguransa nasionál $6.099.832.

Programa defeza nasionál $4.077.517, programa asesu justisa prevee $50.000, programa jestaun rekursu petróliferu no minerál prevee $2.150.000, programa garante liberdade espresaun no asesu informasaun prevee $450.000.

Programa transporte prevee $400.000, programa boa-governasaun no jestaun instituisionál prevee $11.053.764, programa agrikultura prevee $5.774.544, programa bee no saneamentu prevee $9.150.068 ho programa eletrisidade prevee $11,419,593.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here