Autoridade RAEOA no PNDS inaugura projetu UKL unidade ida iha suku Cunha. Imajen mídia ZEEMS.

DILI, 26 janeiru 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), hamutuk ho Programa Nasionál Dezenvolvimentu Suku (PNDS), tersa ne’e inaugura projetu Uma Kbiit Laek (UKL) unidade-ida iha aldeia Noeninen, suku Cunha, sub-rejiaun Pante Makasar.

Prezidente Autoridade RAEOA, Arsénio Paixão Bano, fó parabéns ba VIII Governu Konstitusionál, tanba kria polítika Uma Kbiit Laek, ba komunidade kbiit laek sira iha teritóriu nasionál inklui Oé-Cusse.

Nune’e mós nia agradese ba ekipa tékniku PNDS, Ekipa Jestaun Suku, veteranu, autoridade komunitáriu no seguransa suku, tanba akompaña ona prosesu implementasaun projetu UKL hosi inísiu to’o finaliza ho susesu.

Autoridade RAEOA no PNDS inaugura projetu UKL unidade ida iha suku Cunha. Imajen mídia ZEEMS.

Diretór PNDS RAEOA, Sebastião Tanesi, informa, orsamentu ba Uma Kbiit Laek foin inagura nia médida métru 7×7,7 komposta hosi kuartu tolu (3) sala vizíta ida (1), sala koziña ida (1), kompleta ho eskada ema ho defisiensia nian, ho valór orsamentu hamutuk $17,000.

“Iha Oé-Cusse, foin inaugura unidade ida, tanba projetu UKL iha Oé-Cusse hamutuk 36, agora ida remata ona, ba unidade 35 ne’e hotu-hotu sei iha faze konstrusaun, balu hasa’e ona batako no balu hasa’e ona sinta leten,” nia informa.

Maske nune’e tuir tarjetu, unidade-35 ne’e sei finaliza iha fulan-marsu tinan ne’e, tanba situasaun udan difikulta transporte atu transporta materiál ba iha baze, entaun ida-ne’e maka sai obstákulu ba ezekuzaun kontrusaun sira paradu hodi hein udan-been menus hafoin kontinua fali.

Nia fó-sai katak, implementasaun projetu UKL ba unidade-36 iha Oé-Cusse tama iha aprovizionamentu fahe koutasaun ba empreza fornesedór lokál tolu, atu fornese materiál lokál no fábrikadu, no kontrola hosi Ekipa Jestaun Suku idak-idak, no akompañamentu hosi tékniku PNDS.

Benefisiáriu UKL iha aldeia Noeninen, Anastásia Mauno, sente kontente no agradese ba Governu, tanba apoia ona uma ba kbiit la’ek sira, nune’e bele hela iha fatin dignu.

Entretantu, iha tinan fiskál 2021 Governu harii Uma Kbiit Laek hamutuk unidade 1.254 iha suku 424 iha teritóriu nasionál ho montante orsamentu hamutuk $25,000.000 ho kustu ba kada uma purvolta $14,000 to’o $17,000.

Purtantu projetu Uma Kbiit Laek, ne’ebé kontrui komposta hosi modelu rua, modelu 48 m2, inklui kuartu tolu (3), sala vizíta ida (1) no dapúr ida (1), modelu 37 m2 inklui kuartu rua (2), sala vizíta ida (1) no dapúr ida (1).

Jornalista         : Abílio Elo Nini
Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here