Treinamentu tátika asisténsia seguransa ba entidade a’as iha Komandu UEP, Bairru-Pité, tersa (25/01). Imajen TATOLI/Arminda Fonseca

DILI, 25 janeiru 2022 (TATOLI)–Polísia Nasionál Timor-Leste (PNTL) hosi Komandu Unidade Espesiál Polísia (UEP) ka Korpu Seguransa Pesoál (CSP, sigla portugés), tersa ne’e, realiza treinamentu tátika asisténsia seguransa ba entidade a’as, ne’ebé partisipa hosi membru na’in-24, kompostu hosi mane 22 no feto rua, durante fulan-ida.

Komadante UEP, Superintendente Xefe Orlando Gomes, hateten, objetivu treinamentu ne’e hodi fó asisténsia seguransa ba bainaka Very Important Person (VIP) hanesan Prezidente, membru Governu ka bainaka importante sira bainhira hasoru situasaun krusiál ruma, nune’e bele iha koñesimentu no abilidade di’ak atubele ezerse funsaun seguransa.

“Membru tomak iha responsabilidade ba ida-idak nia funsaun, tanba nesesidade ohin ita realiza kursu ba etapa daruak, ha’u hanoin katak kursu ida-ne’e bazeia ba ita-nia dekretu-lei númeru 9/2009 kona-ba misaun kompañia seguransa pesoál,” Orlando Gomes, relata iha Komandu UEP, Bairru-Pité.

Ho treinamentu báziku ne’e, membru sira preparadu atu kumpre misaun hanesan rezolusaun no jestaun insidente krítiku, intervensaun tátika iha situasaun violénsia konsentradu ka ho perigu a’as, komplexu no risku.

“Sira preparadu halo seguransa no protesaun ba entidade boot sira. Nune’e ita boot sira hanesan membru PNTL iha Kompañia Seguransa Pesoál, ne’ebé sai hanesan autór prinsipál atu halo protesaun ka evakuasaun ba ita-nia entidade sira, ne’ebé ita presiza treinu tékniku ba seguransa pesoál tanba ita-boot sira mai hosi kontinente jerál, balun mai hosi Batallaun Orden Públika (BOP), no Kompañia Operasionál Polísia,” Superintendente Xefe akresenta.

Iha sorin seluk, tuir responsável programa ne’e, iha esperiénsia barak ne’ebé hatudu ona iha terrenu katak iha fallansu barak mak mosu, tanba menus treinamentu.

Inisiativa ne’e sai fatór determina membru sira atu serbisu ho di’ak no profisionál, atu nune’e bele halo protesaun ba entidade a’as sira.

“Ha’u husu ba ita-boot sira, atu tuir treinamentu ne’e tanba sei hatudu oinsá hasoru situasaun ruma ne’ebé ita la espera, nune’e bele preparadu atubele atua ita-nia VIP ba fatin ne’ebé seguru, tanba ne’e presiza serbisu ho disiplina tanba disiplina mak xave susesu ba ita-nia servisu,” nia hameno.

Nune’e mós, Komadante Kompañia Korpu Seguransa Pesoál, Inspetór Xefe, Marcos Soares Lopes, konsidera formasaun bázika CSP ne’e, marka tan istória ida tanba bazeia ba planu CSP nian, ne’ebé hato’o ona ba Komadante Jerál PNTL atu hetan aprovasaun iha tinan kotuk ba.

“Realizasaun kursu ne’e tanba iha tinan 2018-2021, membru foun barak mai iha CSP hodi hala’o seguransa pesoál ba ita-nia entidade a’as sira, maibé la liuhosi selesaun ka prienxe rekezitu ruma, maibé tanba nomeasaun direita hosi entidade a’as sira, tanba ne’e formasaun ne’e atu hasa’e ita-boot nia koñesimentu no abilidade hodi hala’o operasaun serbisu iha terrenu ho profisionál tuir prosedimentu ne’ebé iha,” nia dehan.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here