Prezudente Autoridade RAEOA, Arsénio Paixão Bano, inaugura projetu perfurasaun sistema bee-moos iha suku Lela-Ufe. Imajen mídia ZEESM.

DILI, 25 janeiru 2022 (TATOLI) – Komunidade hamutuk na’in-2.587 hosi aldeia Mahata, Kuat-Enes no Hau-Ufe sai benefisiáriu direita iha perfurasaun sistema bee-moos, ne’ebé autoridade Rejiaun Administrativa Espesiál Oé-Cusse Ambeno (RAEOA) konstrui iha bairru Noa-Ana, suku Lela-Ufe, sub-rejiaun Nítibe.

Perfurasaun sistema bee-moos ne’e, hahú konstrusaun iha 2021, nune’e iha tersa ne’e Prezidente Autoridade RAEOA, Arsénio Paixão Bano, akompaña ho membru autoridade komunitáriu ofisiálmente inaugura projetu perfurasaun sistema bee-moos ne’e, hodi integra ba komunidade suku Lela-Ufe atu uza ba nesesidade moris nian.

Nia informa, bee-moos sai planu prioridade daruak hafoin rezolve COVID-19, tanba bee-moos ne’e importante ba komunidade sira iha área rurál.

Esforsu ne’ebé autoridade prepara maka halo konservasaun bee-matan iha suku 18 pertensia ba sub-rejiaun haat hamutuk 114, perfurasaun unidade 25 iha sub-rejiaun Oésilo, Nítibe no Pante Makasar, iha vila inklui fatin seluk.

“Ha’u kontente, ohin autoridade inaugura fasilidade bee-moos ida-ne’e, atu fó bee no fó moris ba estudante, agrikultór sira atu uza ba nesesidade uma laran, no uza mós atividade agrikultura nian, ida-ne’e maka autoridade nia hakarak atu ajuda fasilita nia povu atu asesu bee-moos ho fasil, entaun ha’u fiar ba oin sei la susar ona ba bee-moos,” Arsénio Paixão Bano, informa ba Agência Tatoli, liuhosi telefónika, tersa ne’e.

Xefe suku Lela-Ufe, José Neno Sila, agradese tanba komunidade sira tinan barak konsumu de’itbee-matan sira, la’o kuaze kilómetru ida mak foin hetan bee, maibé iha tinan ida-ne’e komunidade aldeia tolu ho populasaun 2.587 iha suku Lela-Ufe asesu ona fasilidade ne’e.

Perfurasaun bee-moos ne’e sei benefísia aldeia Mahata ho populasaun 1.214, aldeia Kuat-Enes uma-kain 50 ho populasaun 1.037, no bairo Nefolete, aldeia Hau-Ufe uma-kain 70 ho populasaun 336.

“Ha’u kontente tanba komunidade sira sei asesu bee-moos ne’e iha bairu idak-idak ne’ebé besik, lahanesan uluk la’o dook kilómetru ida mak foin hetan bee iha bee-matan sira,” lider lokál ne’e orgullu.

Benefisiáriu, Miguel Auni Oqui, hosi aldeia Kuat-Enes, hato’o agradese ba autoridade RAEOA no empreza nu’udar ezekutadór ba konstrusaun perfurasaun sistema bee-moos iha Noa-Ana, tanba durante faze konstrusaun komunidade koopera di’ak ho lia-na’in iha suku, nune’e atinje duni rezultadu ho susesu.

Entretantu, projetu perfurasaun sistema bee-moos ne’e, ezekuta hosi empreza Am-Lhichoe Unipesoál, Lda, ho valór kontratu $494,727.59, ne’ebé aloka hosi Orsamentu Jerál Estadu (OJE) 2021, ho durasaun servisu fulan-10.

Purtantu obra perfurasaun ne’e nia médida profunda metro 65, ho kualidade débitu bee-moos litru 6.8, no rezultadu instala torneira hamutuk unidade 27, kobre ba aldeia Mahata, Nefolete no Hau-Ufe.

Jornalista         : Abílio Elo Nini
Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here