Komandante UEP Superientendente Xefe, Orlando Gomes. Imajen TATOLI/Francisco Sony

DILI, 25 janeiru (TATOLI)–Polísia Nasionál Timor-Leste (PNTL) hosi Unidade Espesiál Polísia (UEP), daudaun ne’e prepara ona membru atu halo seguransa másima ba kandidatu Prezidente Repúblika.

“Ita-nia membru totál besik 800, nune’e durante iha eleisaun sei hatún sira hotu hodi partisipa. Daudaun ne’e halo preparasaun liuhosi treinamentu no formasaun,” Komadante UEP, Superintendente Xefe, Orlando Gomes, iha Komandu UEP, Bairro Pité, tersa ne’e.

Daudaun Komandu UEP prepara membru hodi hein orientasaun hosi Komandu Jerál PNTL atu koloka seguransa ba kandidatu Prezidente Repúblika.

“Bainhira ita hetan ona despaixu hosi Komandante PNTL mak bele nomea membru sira ba asegura kandidatu sira,” nia akresenta.

Kona-ba transporte seguransa ba eleisaun, unidade ne’e hetan apoiu karreta hosi Komandu Jerál, nune’e atu halo atividade ho di’ak.

Iha biban hanesan, Komadante Kompañia Korpu Seguransa Pesoál, Inspetór Xefe, Marcos Soares Lopes, hateten, iha membru UEP ka Korpu Seguransa Pesoál (CSP, sigla portugés) hamutuk 265 durante ne’e halo seguransa ba Very Important Person (VIP).

Notísia relevante: Membru CSP na’in-24 partisipa treinamentu tátika asisténsia seguransa ba entidade a’as

Membru sira koloka hodi halo seguransa ba orgaun soberania haat, eis-titulár, membru VIII Governu, no mós instituisaun sira hanesan Provedoria Direitu Umanu no Justisa (PDHJ, sigla portugés), Komisaun Antí-Korrupsaun (CAC, sigla portugés), inklui Embaixadór Amérika.

“Tuir planu Komandu CSP, kolokasaun membru sira haree ba grau ameasa, ne’ebé daudaun orgaun soberanu ita koloka seguransa na’in-lima ba leten, membru Governu na’in-haat lae tolu, no ba eis-titulár sira na’in-lima ba leten,” nia tenik.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here