Prezidente Konsellu Administrasaun APORTIL, I.P sesante, Flávio Cardodo Neves. Imajen TATOLI/António Gonçalves

DILI, 25 janeiru 2022 (TATOLI)—Prezidente Konsellu Administrasaun Autoridade Portuáriu Timor-Leste, Institutu Públiku (APORTIL, I.P) sesante, Flávio Cardoso Neves, klarifika razaun nia parte lakohi asina pagamentu ba ró-ahi KMP Tranship II, tanba lakohi tama prosesu judisiáriu.

“Atu klarifika, la’ós lakohi asina maibé la prosesa pagamentu ho razaun tanba prosesu ne’e órgaun judisiáriu sira halo hela sira-nia serbisu, tanba ne’e ha’u-nia pozisaun klaru, ita bele halo asaun balun maibé hein lai pareser ruma hosi Komisaun Antí-Korrupsaun (CAC, sigla portugés) no Ministériu Públiku (MP), tanba dokumentu sira foti hotu ona. Tanba ne’e, tenki hein prosesu ne’ebé la’o ona. Ha’u fó ezemplu, kuandu halo pagamentu derrepente pareser hosi entidade rua ne’e katak selu de’it balun, entaun  problema boot no ita labele halo buat ida tanba osan tama ona iha empreza nia konta bankária,” Flávio Cardoso hateten ba Agência TATOLI, via telefónika, tersa ne’e.

Notísia relevante: Lamartino de Oliveira troka Flávio Cardoso lidera APORTIL, I.P

Antes ne’e, iha semana hirak liubá, Primeiru-Ministru (PM), Taur Matan Ruak, hasai despaixu numeru 004/PM/1/2022, hodi ezonera membru Konsellu Administrasaun APORTIL, I.P, kompostu hosi Flávio Cardoso Neves hosi kargu Prezidente, José Madeira Marques hosi Vogál I, Joana Ribeiro hosi kargu vogal II.

Nune’e, Prezidente sesante konsidera, pozisaun ne’ebé nia asume hanesan konfiansa polítika, tanba ne’e bainhira Governu la konkorda ho nia aktu, maka entidade kompetente iha kompeténsia tomak atu foti desizaun.

Antes ne’e, Flávio Cardoso, konfesa katak, nu’udar Prezidente Konsellu Administrasaun, nia parte haruka ona karta ba CAC hodi husu pareser ruma, maibé ikus mai hetan resposta ho karta, ne’ebé haruka halo koordenasaun ho MP.

Notísia relevante: CAC iha faze analiza pedidu APORTIL ba pagamentu ró Tranship II

“Tanba ne’e ha’u la halo asaun ruma, tanba CAC mak halo asaun buska, ha’u labele interven prosesu iha Ministériu Públiku. Tanba ne’e, ha’u la halo no problema la’ós asina pagamentu tanba kontratu, invoice ne’e Ministru mak asina hotu, maibé orsamentu ne’e iha APORTIL, maibé funsionáriu sira sente la seguru atu halo pagamentu, ha’u labele interven hodi obriga sira halo pagamentu. Ha’u nu’udar jestór, ezekuta ne’e tékniku sira, maibé sira la halo asaun, ha’u mós laiha kbiit atubele obriga,” nia esklarese.

La halo manutensaun ba ró-ahi Berlin Nakroma

Aleinde ne’e, Prezidente Konsellu Administrasaun sesante esklarese, prosesu halo manutensaun ró-ahi Berlin Nakroma la’ós lori tempu badak, maibé tenki liuhosi prosesu International Competitive Bidding (ICB), ne’ebé prosesu lais liu fulan-tolu.

“Ita konsege loke konkursu iha maiu 2021 no tama outubru iha empreza ida mak manan. Ha’u hakarak klarifika katak, Konsellu Administrasaun asume pozisaun ne’e iha tinan 2019 nia-klaran ona, ami ba jere orsamentu restu no iha tinan 2020 orsamentu laiha tanba xumba iha Parlamentu Nasionál, ne’ebé labele halo atividade ruma tanba laiha orsamentu. Tanba ne’e ró  fila hosi manutensaun iha dezembru 2020 mak avaria. Nune’e, tama iha tinan 2021 iha kondisaun Estadu Emerjénsia no Serka Sanitária, ne’ebé labele obriga funsionáriu sira tama serbisu,” nia haktuir.

Nia mós argumenta, razaun la haruka ba halo manutensaun la’ós impede no laiha kbiit, maibé  nasaun ne’ebé atu simu halo manutensaun ró, implementa hela lockdown momentu ne’ebá tanba situasaun pandemia.

“Hanesan oportunidade ida atu hadi’a jestaun Berlin Nakroma ne’e, tanba tinan 15 ona tripulante sira hanesan ema estranjeiru, tanba ne’e maka tenta ho situasaun ne’e ho prezensa ró Berlin-Ramelau hodi hadi’a jestaun,” Flávio akresenta.

Enkuantu, Flávio Cardoso la marka prezensa durante seremónia pose ba membru Konsellu Administrasaun APORTIL, I.P tanba hetan konvite iha tempu ne’ebé besik atu realiza ona seremónia.

“Ha’u hetan informasaun katak ha’u tenki marka prezensa hodi hato’o liafuan ruma, maibé hetan iha tempu besik ona realiza seremónia, tanba ne’e ha’u la partisipa la’ós tanba hirus ka la satisfeitu ho desizaun ne’ebé halo mai ha’u, maibé bainhira loron-rua ka tolu antes hateten ba ha’u, konserteza ha’u bá,” nia dehan.

Flávio Cardoso Neves no membru Konsellu Administrasaun APORTIL, I.P antes ne’e simu pose iha loron 03 juñu 2019, ne’ebé mandatu sei termina iha tinan 2022 nia laran.

Jornalista : Antónia Gusmão

Editora     : Julia Chatarina 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here