Pesoál Saúde iha sentru saúde Vera Cruz halo hela atendimentu ba labarik sira-ne’ebé hetan moras dengue, kuarta (19/01/2022). Imajen Tatoli/Antonio ‘Dasiparu’ Gonçalves.

DILI, 25 janeiru 2022 (TATOLI)— Diresaun Nasionál Saúde Publika liuhosi Departamentu Visilánsia Epidemolojia, iha Ministériu Saúde, tersa ne’e, rejista iha meadu janeiru ne’e kazu dengue hamutuk 901, hosi númeru ne’e na’in-17 mak mate.

“Situasaun kazu Dengue iha Timor-Leste, loron 25 janeiru 2022, kazu dengue hamutuk 901 no kumulativu óbitu na’in-17,” refere nota ne’ebé Agência TATOLI asesu kuarta ne’e.

Notísia relevante: Kazu dengue aumenta, família pasiente preokupa HNGV laiha espasu

Maioria kazu ne’e deteta husi munisípiu Dili ho totál 604, Baucau iha kazu 44, Manatuto 57, Covalima 31, Ermera 71, Manufahi 44, Viqueque neen, Ainaro neen, Liquiça sia, Aileu ualu no Bobonaro 21.

Hosi númeru óbitu na’in-17 ne’e maioria labarik, hanesa kazu óbitu iha Dili na’in-9, Ermera iha óbitu na’in-haat, na’in-ida hosi Ainaro, na’in-ida hosi Bobonaro no na’in-rua hosi Covalima, nune’e totál Case Fatality Rate nivél nasional ho 1,9%.

To’o ohin loron kuarta semana janeiru ne’e, posto administrativu Dom Alexo iha kazu 300, Cristo-Rei 118, Vera-Cruz 85, Na’in Feto 92.

Alende ne’e, Fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue 162, Klínika Fatumeta 88, sentru saúde Comoro 136, sentru saúde Vera-Cruz 47, sentru saúde Formoza 99, sentru saúde Becora 59, sentru saúde Atauro  haat, sentru saúde Metinaru lima,  Klínika Bairru-Pité rua no Klínika Motael na’in-ida.

Nune’e, Ministériu Saúde apela ba populasaun iha Dili laran no mós iha munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, senti laran sa’e, liman ain no sikun moras hodi bele hetan atendimentu husi profisionál saúde sira.

Apela mós ba autoridade munisipál no autoridades lokál atubele orienta komunidade halo limpeza jerál iha suku no bairru sira hodi fase tanke, bidon ka balde tau bee semana ida dala ida.

Hamoos sasán ka limpeza hanesan roda aat, bazu aifunan atu susuk labele tau tolun, halot ropa ho di’ak iha ita nia uma laran, uza ropa ne’ebé liman naruk karik toba iha tempu loron, uza aimoruk hanesan repelente ka autan, uza mosketéiru karik toba iha tempu loron, soe lixu iha nia fatin.

Notísia relevante:Pasiente dengue sa’e ba 713 no óbitu na’in-16

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here