Diretór Jerál STAE, Acilino Manuel Branco. Imajen TATOLI/Egas Cristóvão

DILI, 24 janeiru 2022 (TATOLI)—Sekretariadu Tékniku Administrasaun Eleitorál (STAE), seidauk finaliza sinkronizasaun dadus eleitór iha territóriu nasionál inklui diaspora tanba sikroniza ne’e hosi postu administrativu ne’ebé barak liu.

Notísia Relevante: Alterasaun lei resensiamentu eleitorál difikulta sidadaun trata kartaun eleitorál

“Ita sei halo sikronizasaun dadus hosi postu administrativu sira-ne’e nune’e prosesu sinkronizasaun dadus sei la’o hela no seidauk finaliza, tanba sei prodúS lista provizóriu,” Diretór Jerál Sekretariadu Tékniku Administrasaun Eleitorál (STAE), Acilino Manuel Branco, informa ba Agência Tatoli, iha nia knaar fatin Caicoli, Dili, segunda ne’e.

STAE sei hasai lista espozisaun ida bainhira sinkronizasaun ba dadus eleitór sira iha territóriu nasionál no iha diaspora konklui ona.

Tuir kalendáriu ne’ebé públika iha Jornál da Repúblika iha loron 20 sei halo sinkronizasaun hafoin ne’e mak emprime lista provizóriu.

Depois iha loron 28-30 fulan-janeiru sei distribui sasán ba munisípiu sira no iha loron 01-02 fulan-fevereiru ne’e tempu atu ema ida-idak konsulta nia naran iha sentru votasaun sira iha territóriu nasionál.

“Loron 09-10 fevereiru ita sei rekolla lista sira depois loron 16-17 fevereiru ita sei halo sinkronizasaun ikus, hodi halo korresaun nune’e ita bele fó sai rezultadu finál eleitór sira nian,” nia dehan.

Bazea ba kalendáriu, nia hateten, STAE hahú halo resensiamentu eleitorál iha fulan-janeiru 2021 ne’ebé remata ona halo resensiamentu eleitorál iha loron 14 fulan janeiru tinan ne’e.

Antes ne’e Prezidente Repúblika, Francisco Gusterres ‘Lú-Olo’, dekreta ona data eleisaun prezidensiál ne’ebé sei hahú iha loron 19 fulan-marsu tinan ne’e.

Bazea ba ida-ne’e, Tribunal Rekursu mós termina loron ikus ba kandidatura Prezidente Repúblika peiódu 2022-2027 atu rejista naran ne’e iha 04 fevereiru 2022.

Notísia Relevante: Resensiamentu eleitorál sei konklui iha 14 janeiru

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here