Sekretáriu Estadu Komunikasaun Sosiál, Merici Juvinal dos Reis “Akara” hasai retratu hamutuk hafoin hala’o vizita ba Rádiu Komunidade Tokodede Liquiça. Imajen Tatoli/Cidalia Fátima.

LIQUIÇA, 24 janeiru 2022 (TATOLI)—Sekretáriu Estadu ba Komunikasaun Sosiál, Mercio Juvinál dos Reis ‘Akara’, rekomenda ba Rádiu Komunidade (Rakom) Tokodede atu koordena ho Dirasaun Sentru Rádiu Komunidade (CRC-sigla Portugues) hodi dezenvolve proposta ba atu bele husu ekipamentu no fasilidade ba parseiru sira.

Governante ne’e husu aru rádiu komunidade sira bele iha kreatividade rasik hodi husu apoiu ekipamentu no fasilidade ba parseiru sira no labele hein de’it orsamentu transferénsia públika hosi Governu.

“Ha’u orienta ba diretór sentru rádiu komunidade (CRC) katak diretór ho nia ekipa atu apoiu jerente rádiu komunidade sira la’ós trasnfere osan hela de’it, ne’e knar ida maibé oinsá ajuda sira atu dezenvolve sira nia kondisaun rasik liuhosi halo hamutuk proposta ruma ba ita-nia parseiru sira atu sira bele fo apoiu ekipamentu hanesan komputador, laptop, record disck inklui transporte,” Governante ne’e hateten ba jornalista sira hafoin hala’o vizita ba Rádiu Komunidade Tokodede Liquiça, segunda ne’e.

Tanba, nia dehan, parseiru sira-nia prezensa iha Timor-Leste hodi fó apoiu ba Governu nia servisu, nune’e rádiu komunidade hamutuk ho CRC dezenvolve proposta ruma mak Governu liuhosi Sekretária Estadu Komunikasaun Sosiál (SEKOMS) prontu atu bele reforsa proposta refere.

“Hanesan uluk ita halo ho UNICEF sira konsege apoiu, la’ós de’it hein hosi Governu. Dezenvolve proposta halo komunikasaun ho parseiru, ekipamentu la tenke Governu. Preokupasaun ida-ne’e, ha’u hakarak rezolve ho dalan ida-ne’e,” nia esplika.

Tuir nia, iha fulan tolu no ne’e tuir mai sei halo avaliasaun hodi haree fila-fali progresu servisu rádiu komunidade (Rakom) no sentru rádiu komunidade (CRC) nian hodi buka meiu ba dezenvolve kondisaun rasik.

Jestór Rádiu Komunidade (Rakom) Tokodede, Eduardo Exposto, informa difikuldade hirak ne’ebé sira hasoru mak fasilidade ne’ebé dadauk ne’e iha barak mak aat tanba uza ona iha tempu naruk nia laran, nune’e presiza tan ekipamentu sira hanesan komputadór no disck recorder inklui transporte.

“Ami sei tenta hodi halo planu ba dezenvolve proposta, maibé ami presiza duni komputadór no disck recorder tanba iha ne’e ami iha staff na’in-neen inklui estajiáriu sira. Kona-ba transporte, ami iha ona motor boot rua (Mega Pro) maibé ida-ne’e mane de’it mak bele lori, feto labele no ami-nia área kobertura mós luan tanba Liquiça iha suku 23,” nia dehan.

Preokupasaun sleuk, nia informa, iha Liquiça ne’e suku tolu mak seidauk hetan asesu totalmente ba programa rádiu nian hanesan suku Vatuboro iha postu administrative Maubara, Leotela iha postu administrativu Liquiça Vila no suku Leorema iha postu administrativu Bazartete.

“Razaun tanba foho aas, rádiu komunidade Tokodede uza kapasidade transmiter ne’e 100 Watt de’it, nune’e fahe signál la to’o ba suku 23 ne’e tomak. Iha mós aldeia balun iha suku hitu (7) ka ualu (8) ne’ebé mak totalmente labele asesu rádiu komunidade Tokodede,” nia hateten.

Rádiu komunidade Tokodede halo ona rekomendasaun atu muda metodu frekuensia maibé parte Autodidade Nasional Komunikasaun (ANC) mós hateten ona katak kapasidade frekuensia rádiu komunidade labele bootliu mídia nasionál, nune’e rádiu komunidade hetan de’it transmiter natoon.

Hatán ba preokupasaun ne’e, Mericio Juvinal dos Reis “Akara” kompromete hodi fó orientasaun ba diretór sentru rádiu komunidade (CRC) atu bele alarga tan liña transmisaun no tekniku sira mak bele fó solusaun di’akliu.

Governu sei garante atu timor-oan hotu bele hetan informasaun no ida-ne’e konsidera importante tanba rádiu komunidade (Rakom) Tokodede Liquiça tenke asesu iha área hotu iha Liquiça laran tomak.

Jornalista : Cidalia Fátima

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here