Jestór Rádiu Komunidade Tokodede, Eduardo Exposto, kahe tais ba Sekretáriu Estadu Komunikasaun Sosiál, Mericio Juvinál dos Reis ‘Akara’, bainhira hala’o vizita iha Rádiu Komunidade Tokodede Liquiça. Imajen Tatoli/Cidalia Fátima.

LIQUIÇA, 24 janeiru 2022 (TATOLI)— Sekretáriu Estadu Komunikasaun Sosiál, Mericio Juvinál dos Reis ‘Akara’, husu ba Rádiu Komunidade (Rakom) sira atu fó direitu antena hanesan ba kandidatu Prezidente Repúblika sira hotu iha kobertura ba kampaña eleitorál iha eleisaun prezidensiál 2022.

Notísia Relevant: CNE: Preparasaun eleisaun prezidensiál kuaze konklui

“Kona-ba planu 2022 mantein saida mak di’ak ona liu-liu atu hakat ba Eleisaun Prezidensiál. Ha’u husu ita-boot sira servisu ho profisionál no independente, lalika tau an iha parte ida depois halo notísia negativu ba ida seluk. Ita-nia knar mak hanesan ne’e. Husu ba imi no ba rádiu komunidade tomak atu fó direitu antena ne’ebé hanesan ba kandidatura Prezidente Repúblika hotu-hotu,” Mericio Juvinal dos Reis ‘Akara’ hatetetn ba jornalista sira bainhira hala’o vizita no halo sorumutu ho jerente Rádiu Komuniade Tokodede Liquiça, iha edifísiu Rádiu Komuniade Liquiça, segunda ne’e.

Nia hateten, rekomendasaun ne’e la’ós ba de’it Rádiu Komunidade Tokodede maibé ba rádiu komunidade sira hotu iha territóriu Timor-Leste atu bele kumpre nafatin kodigu étika jornalistíka hodi fó espasu no oportundiade entrevista hanesan ba kandidatura sira hotu.

“Kampaña besik ona. Ha’u husu atu ita kaer metin kodigu étika jornalístika, ita tenke haree kandidatu hotu di’ak, fó espasu no halo entrevista mós ho hanesan. Ita independentr, tenke hato’o mak lia-loos no informasaun ne’ebé kredivel no labele inventa,” nia esplika.

SEKOMS hato’o parabéns ba Rádiu Komunidade Tokodede tanba kontinua eziste no apoiu Governu hodi fasilita informasaun ba komunidade maske ho kondisaun ne’ebé minimu.

Rádiu Komunidade sira tenke hasoru tinan foun liu-hosi halo planu foun no kria nafatin ligasaun profísionál hodi halo dezenvolvimentu iha área komunikasaun nian.

“Imi iha progresu di’ak, maske fasilidade naton. Ha’u mós agradese, ita iha estajiariu barak ida-ne’e prosesu kaderizasaun katak rádiu komunidade tenke halo, inisitativa jestór ne’e di’ak tebes,” Governorante ne’e hateten.

Jestór Rádiu Komunidade Tokodede, Eduardo Exposto, hateten drante tinan 2021ne’e Rádiu Komunidade Tokodede konsege prodús ona notísia 703 no partisipasa kobeunrtura ba mane 500-resin no feto 400-resin.

Nune’e, iha tinan ida-ne’e Rádiu Komuniddae sei hasa’e kobertura liu-liu fasilita komunidade ho informasaun kona-ba Prosesu kampaña eleitorál ba kandidatu Presidente Repúblika sira-ne’ebé atu kompete iha eleisaun prezidensiál 2022.

“Ba tinan ne’e ami mós sei partisipa iha prosesu kampaña eleitorál hosi kandidatu Prezidente Repúblika ba eleisaun prezidensiál nian, ami halo coopsaun ho CNE atu kordena ho líder sira ne’ebé koloka ba munisipiu atu ko’alia kona-ba lala’ok eleisaun inklui parte seguransa relasiona ho seguransa iha prosessu kampaña nian,” nia dehan.

Nia haktuir, programa prinsipál Rakom Tokodede durante tinan 2021 mak Governu ko’alia ho lian Tokodede ne’ebé involve autoridade lokál, diretó munisipál sira atu fahe informasaun kona-ba servisu Governu nian no programa seluk mak Matadalan ne’ebé fahe inspirasaun kona-ba joven sira-nia susesu liu-liu iha munisipiu Liquiça.

“Iha tinan 2021 preokupasuan komunidade nian ami kobre hotu, ami mos involve diretór nasionál sira no munisipál, ko’alia mós kona-ba COVID-19 no vasinasaun nian,” nia dehan.

Tuir planu, SEKOMS rasik sei halo mós vizita hanesan iha rádiu komuniddae hotu-hotu atu bele haree fila-fali progresu servisu durante tinan 2021 no konfirma fila-fali planu ba tinan 2022 liu-liu iha prosesu eleisaun prezidensiál 2022-2027.

Notísia Relevante: Eleisaun ba Prezidente Repúblika sei akontese iha 19 marsu 2022

Jornalista : Cidalia Fátima

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here