SEFOPE liuhosi Dirasaun Nasionál Empregu Exteriór (DNEE) hala'o enkontru ho família traballadór Australia na'in 17. Iha salaun senai Becora, segunda (24/01). Imajen Tatoli/Francisco Sony

DILI, 24 janeiru 2022 (TATOLI)- Sekretáriu Estadu Formasaun Profisionál no Empregu (SEFOPE) liuhosi Diresaun Nasionál Empregu Exteriór, sei haruka tan traballadór nain-17 ba Austrália hodi serbisu iha, durante fulan-neen.

“Durante Covid-19 iha 2021 Austrália nunka loke odamatan ba ita nian traballadór sira atu ba serbisu iha ne’ebá, maibé ohin sira loke fali sira odamatan hodi simu hikas ita nian traballadór nain-17 atu bá servisu iha Austrália,” Diretór Empregu Exteriór (DEE)-SEFOPE, Filomeno Soares ba jornalista sira hafoin ramata seremonia despedida ba trabaladór nain-17 iha Salaun DEE Becora, segunda ne’e.

Diretór Nasionál Empregu Exteriór SEFOPE, Filomeno Soares. Imajen TATOLI/Francisco Sony

SEFOPE hala’o seremonia despedida ba traballadór timór-oan na’in-17, hodi arranka ba Austrália iha loron 26 janeiru ne’e.

“Sira ne’e sei ba serbisu iha kompañia rua, hanesan Horlintan ho Tasmánia, sira sei arranka iha 26 janeiru sira ne’e,” nia akresenta.

Husi traballadór nain-17, nain-lima mak nuudar traballadór foun no nain-12 ne’e tuan, maibé iha dezempeñu di’ak, nune’e mak kompañia kontaktu hodi kontrata hikas sira.

“Sira ohin ita bolu mai atu halo despedida no asina termu aseitasaun ne’ebé maka marka prezensa direita hosi sira nian família rasik no laiha ona problema saúde tanba tuir ona teste Covid-19  hein arranka de’it ba Austrália,” nia afirma.

Diretór Jerál SEFOPE, Paulo Alves. Imajen TATOLI/Francisco Sony

Iha biban hanesan, Reprezentante SEFOPE, Paulo Alves husu ba trabaladór nain-17 atu kumpre regra ne’ebé maka Governu liuhosi SEFOPE hatur ona iha termu aseitasaun ne’e rasik.

“Husu ba ita bo’ot sira labele halai ses hosi sistema hodi sai traballadór ilegál, tanba ita bo’ot sira nuudar reprezentante Estadu Timor-Leste nian, tenke halo kontaktu nafatin ho família labele lakon kontaktu no seluk mak husu ita bo’ot labele estraga osan ne’ebé imi hetan nune’e halo mudansa iha ita bo’ot sira nia familia,” nia enkoraja.

Entertantu, Traballadór, Andriano Correia, sente kontente tanba bele hetan oportunidade daruak hodi ba serbisu iha Tasmânia liuhosi programa ne’e.

Traballadór Australia, Adriano da Conceição Correia. Imajen Tatoli/Francisco Sony

Tanba, hahú iha tinan 2014 halo servisu dahuluk servisu iha Tasmánia konsege halo mudansa ba família nia moris.

“Durante ha’u servisu iha Tsmânia ha’u la sai sasukat, maibé ha’u dehan de’it, osan ne’ebé ha’u servisu iha tinan hirak nia laran besik $70.000, ha’u bele dehan konsege halo mudansa ba iha ha’u nia moris no ha’u nia família nia moris tanba konsege halo uma rua, hola karreta, motór bele sustenta ha’u nia família,” nia agradese.

Jornalista : Natalino Costa

Editór       : Florencio Miranda Xiemes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here