Ministru Ensinu Superiór Siénsia no Kultura, Longuinhos dos Santos. Imajen Tatoli/Francisco Sony

DILI, 24 janeiru 2022 (TATOLI)—Ministériu Ensinu Superiór Siénsia no Kultura (MESSK) no Sekretaria Estadu Arte no Kultura (SEAK) aprezenta apoiu liña kréditu ba universidade privada inklui apoiu uma-lulik no grupu kulturál iha territóriu nasionál ba Primeiru-Ministru (PM), Taur Matan Ruak, ne’ebé konsidera hanesan programa prioridade Governu.

“Primeiru-Ministru dehan ida-ne’e maka programa prioridade VIII Governu Konstitusionál, tanba ne’e Ministériu Ensinu Superiór Siénsia no Kultura no Sekretaria Arte no Kultura presiza kontinua apoiu programa ne’e,” Ministru Ensinu Superiór Siénsia no Kultura, Longuinhos dos Santos, iha Palásiu Governu, segunda ne’e.

Membru Governu rua simu konvite hosi Gabinete PM hodi hato’o kestaun rua ne’e, tanba durante ne’e bainhira halo diálogu komunitáriu, ministériu simu sujestaun barak hosi komunidade.

“Aban ami sei selebra memorandu entendimentu ho instituisaun ensinu superior privadu iha Otél Novo Turismo, kona-ba apoiu liña kréditu,” nia akresenta.

Notísia relevante: Semana oin, MESSK-BNCTL asina akordu fó kréditu ba Universidade

Memorandu entendimentu kona-ba liña kréditu ne’e sei realiza entre Banku Nasionál Komérsiu Timor-Leste (BNCTL, sigla portugés) ho universidade 16.

“Loloos dadus universidade akreditadu iha Timor-Leste hamutuk 18, maibé universidade públiku rua hanesan Universidade Nasionál Timor-Leste (UNTL) no Institutu Politékniku Betano (IPB) la tama programa Governu ne’e, foku de’it ba universidade privada,” nia informa.

Bainhira memorandu entendimentu hetan ona legalizasaun mak foin haruka ba BNCTL hodi analiza, hafoin haruka ba ministériu hodi halo aprovasaun hodi hatene númeru fiksu ba prosesu kréditu.

Enkuantu, kona-ba uma-lulik no grupu kulturál sira iha kada munisípiu ne’ebé atu hetan apoiu iha faze tolu hanesan apoiu konstrusaun, rebilitasaun no inaugurasaun.

“Apoiu sira ne’e loloos Governu maka halo direita bazeia ba proposta kada munisípiu sira. Ita prevee ona orsamentu ho montante $200.000, ne’ebé klasifika apoiu uma-lulik aloka $100.000 no apoiu grupu kulturál 100.000,” nia akresenta.

Maski nune’e, daudaun MESSK seidauk bele relata dadus tanba iha hela prosesu verifikasaun no seidauk finál, maibé dadus sekundáriu iha hotu ona liuhosi proposta ne’ebé tama.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here