Produtu lokál iha Merkadu Taibesi. Imajen TATOLI/António Gonçalves

DILI, 24 janeiru 2022 (TATOLI)–Governu liuhosi Ministériu Koordenadór Asuntu Ekonómiku (MKAE) rejista tan benefisiáriu 60.000 ba progama seguransa alimentár hosi munisípiu hotu.

“Agora prepara hela ba faze daruak iha loron 20 fevereiru sira hanesan ne’e, hein katak bele konklui sedu no ita iha benefisiáriu ba 60.000-resin,” Ministru Koordenadór Asuntu Ekonómiku, Joaquim Amaral, informa iha Palásiu Governu, segunda ne’e.

Implementasaun programa Governu ne’e kobre ona territóriu tomak, maski seidauk hotu tanba empreza hasoru difikuldade ba asesu estrada, liuliu tempu udan bainhira halo distribuisaun produtu, maibé entidade responsável halo esforsu hodi lori to’o iha populasaun sira-nia fatin.

Notísia relevante: Ema hamutuk 50.000 sai ona benefisiáriu programa seguransa alimentár

Governu kompromete iha faze daruak, hirak ne’ebé lista verifikadu sei hetan sira-nia direitu.

Programa seguransa alimentár previstu iha Lei númeru 8/2021, 3 maiu, ne’ebé altera Lei númeru 14/2020, 29 dezembru, refere ba Orsamentu Jerál Estadu (OJE) 2021 no aprovasaun medida ba apoiu sósiu-ekonómiku.

Medida ne’e mosu, haree ba impaktu negativu hosi pandemia COVID-19 iha ekonomia nasionál, nune’e Governu propoin alterasaun ba lei 14/2020 ho medida foun oioin inklui medida seguransa alimentár.

Dekretu-lei ne’e fó kbiit ba Sentru Lojístiku Nasionál (CLN, sigla portugés), atu halo kontratu ho produtór lokál ho operadór komersiál sira seluk, hodi hetan ai-han nesesáriu.

Aleinde ne’e, dekretu-Lei ne’e fó atensaun espesiál ba ema no família sira ho rendimentu la liu $1,90 loron ida, ne’ebé atu define sé mak iha direitu ba apoiu espesiál ne’e, maka entidade responsável sira sei uza dadus hosi rejistu uma-kain idaidak iha suku sira hosi Ministériu Administrasaun Estatál (MAE) no Ministériu Solidariedade Sosiál no Inkluzaun (MSSI)

Nune’e, Ai-han ho valór $30 sei fó ba kada sidadaun ne’ebé rejista ona iha ‘Livru Rejistu  Uma-kain’ nu’udar xefe família ka bainhira labele simu sei reprezenta hosi membru ida hosi uma-ain ne’e, ho otas 17  ba leten.

Produtu ne’ebé Governu oferese liuhosi programa ne’e hamutuk neen hanesan foos, batar, fore-mungu, koto, fore-metan no fore-rai.

Governu prevee orsamentu ba programa seguransa alimentár hamutuk millaun $12 no iha posibilidade CLN restoke ba armazen nasionál hodi halo intervensaun ba merkadu, nune’e bainhira mosu dezastre naturál, Governu iha kbiit atubele fó asisténsia ba komunidade afetadu, enkuantu restante sosa produtu lokál ne’ebé agrikultór sira kuda hodi halo distribuisaun.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here