Komandante PNTL Munisípiu Dili, Superintendente Xefe Henrique da Costa, Imajen/Tatoli.

DILI, 22 janeiru 2022 (TATOLI)—Komandu PNTL Munisípiu Dili konsege detein estudante na’in-55 tanba uza atributu Grupu Arte Marsiál (GAM) hanesan Persaudaraan Setia Hati Terate (PSHT), Ikatan Kera Sakti (IKS) no Grupu Arte Rituál (GAR) 77 hodi provoka malu, hafoin rona rezultadu ezame nasionál.

“Ohin, Ita bolu estudante hamutuk 55 mai eskuadra polísia hodi halo identifikasaun tanba sira uza atributu Grupu Arte Marsiál (GAM) no Grupu Arte Rituál (GAR) provoka malu durante komboiu (pawai), hafoin rona sira nia rezultadu ezame nasionál iha sira nian nia eskola,” Komandante PNTL Munisípiu Dili, Superintendente Xefe Henrique da Costa, informa ba Agência TATOLI, via rede sosiál, sábadu ne’e.

PNTL detein estudante hirak ne’e tanba viola lei númeru 5/2017, lei kona-ba arma branka; bandu ema uza sasan kro’at no uza atributu arte marsiál no arte rituál.

“Tanba ne’e mak liuhosi operasaun ne’ebé maka halo hosi ita nia polísia, konsege identifika  estudante sira ne’e hodi halo apreensaun ba atributu ne’ebé uza hodi provoka malu, no ami halo investigasaun, aprezenta ona ba Ministériu Públiku,” Komandante ne’e akresenta

Komandu Munisípiu Dili halo apreensaun motor rua iha área Don Aleixo, 43 iha Kristu Rei no 10 iha Vera Kruz, bainhira estudante sira hala’o karavana (pawai) depois rona rezultadu ezame nasionál.

“Ami halo apreensaun ba motorizada hamutuk 29 tanba la uza kapasete, uza kanu-resin. Ami entrega ona ba iha tránzitu munisípiu Dili atu prosesa hodi aplika multa ba sira”, nia afirma.

Entretantu, iha Sábadu (22/1) ne’e, estudante territóriu nasionál simu nian rezultadu ezame nasionál iha idaidak nia eskola, hafoin iha loron hirak liu ba Ministeriu Edukasaun Juventude no Desportu (MEJD), anúnsia ofisiálmente rezultadu ezame nasionál 2021.

Notísia relevante:  Estudante 50.752 aprovadu ezame nasionál no 18 la pasa

Jornalista: Natalino Costa

Editór     : Florencio Miranda Ximenes

PUBLISIDADE HUSI MTCIiklan

1 KOMENTÁRIU

  1. Se baibain ema dehan Foin-sa’e sira maka futuru nasaun nian, então ita bele ona imajina futuru ita-nia nasaun nian ne’e sei sai halo nu’usá. Dala hira ona maka ita haree, bainhira rona rezultadu ezame nasionál nian estudante sira ba hatudu fali sira orgullu nu’udar membru GAM ka GAR nian, einvez de hatudu kompeténsia ka abilidade kona-ba siénsia ne’ebé sira hetan ona durante eskola.
    Ida tan, hahalok hanessan la’os de’it iha nivel sekundáriu nian maka problema ida ne’e akontese, até iha graduasaun nian mós ida-ne’e akontese, hanessan akontese iha universidade balun iha tempu balun liubá.
    Tuir ha’u nia hanoin, Governo tem que regula didi’ak grupu sira-ne’e tanba selae sira sei bele sobu nasaun ne’e.

HAKEREK NO HATÁN

Please enter your comment!
Please enter your name here