Diretór Jerál Peska MAP, Acacio Guterres. Imajen TATOLI/Natalino Costa

DILI, 20 janeiru 2022 (TATOLI)–Diretór Jerál Peska Ministériu Agrikutura no Peska (MAP), Acacio Guterres, informa, prosesu atu sosa ró indústria peska rua, daudaun ne’e iha ona faze konsultasaun téknika ikus.

“Loloos ne’e prosesu iha tinan 2021, maibé tanba falla entaun ita la konsege hetan konsultasaun, nune’e daudaun mak ita foin hahú prosesu diskusaun téknika ho konsultór sira atu prepara dezeñu Bill of Quantity (BoQ) ba konstrusaun ró, maibé ba tinan ne’e ita sosa uluk ró peska ida,” Diretór Jerál Peska hateten ba Agência TATOLI, iha ninia knaar fatin, Comoro, kinta ne’e.

Tinan oin sei sosa fali ida tanba iha tinan 2021 Konsellu Ministru halo ona apresiasaun hodi sosa ró industria peska rua.

“Ita espera tinan oin mai bele tau osan, nune’e sosa tan ida. Entaun agora ita prosesa uluk ida tuir fali mai mak prosesa tan, maibé iha hanoin kada tinan husu Governu aumenta kuantidade ró tanba ita presiza ró rasik mínimu lima, nune’e bele halo movimentasaun iha tasi-laran,” nia akresenta.

Notísia relevante: Governu autoriza aprovizionamentu ró peska industriál kapasidade 250 GT

Intensaun iha ró peska rasik atu ró ilegál labele kontinua halo movimentasaun iha tasi Timór.

“Bainhira ró ne’e mai, la’ós MAP mak halo operasaun ba kail ikan, maibé sei halo diskusaun iha Konsellu Ministru atu deside fó entidade ne’ebé mak iha poténsia atu halo operasaun ba ró ne’e,” nia tenik.

Daudaun ne’e finaliza uluk dokumetu sira hodi lori ba Komisaun Nasionál Aprovizionamnetu (CNA, sigla portugés) hodi halo konkursu públiku.

“Konkursu sei halo tinan ne’e, maibé fulan ne’e ita finaliza serbisu konsultasaun mak sei lori ba CNA durante fulan-tolu mak loke konkursu internasionál hotu. Nune’e, ekipa sei halo inspesaun téknika ba empreza ne’ebé tuir konkursu sira-nia fatin inklui inspesaun ba kapasidade finanseira ba kada entidade,” Dirijente ne’e dehan.

Bainhira faze inspesaun hotu mak hahú konstrusaun ró, ne’ebé tuir planu serbisu ne’e sei han tempu tinan ida to’o rua tanba ró foun.

“Timor-Leste presiza ró peska rasik tanba bele ajuda Estadu hasa’e  produsaun ikan, nune’e ema hotu bele asesu ho presu asesível, inklui ajuda ekonomia rai-laran nian. Orsamentu ne’ebé tinan ne’e prevee ba ró hamutuk millaun $3 resin, maibé ida ne’e inklui ba konsultór hotu,” nia informa.

Konsultasaun ne’ebé daudaun ne’e hala’o hanesan diskusaun téknika, ne’ebé hetan partisipasaun hosi entidade kompetente hosi Indonézia, Ministériu Transporte no Komunikasaun, Autoridade Portuáriu Timor-Leste (APORTIL), inklui Asosiasaun Mariñeiru timor-oan sira.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here