MAP no WFP realiza enkontru ho parseiru sira hodi hala'o diskusaun kona-ba fortifikasaun foos iha Timor-Leste, iha salaun Otél Novo Turismo, kinta (20/01). Imajen TATOLI/Francisco Sony

DILI, 20 dezembru 2022 (TATOLI)–Ministériu Agrikultura no Peska (MAP) liuhosi Diresaun Nasionál Seguransa Ai-han, ne’ebé nu’udar Komisaun Nasionál Servisu Tékniku ba Nutrisaun (KONSSANTIL) hamutuk ho Programa Ai-han Mundiál (WFP, sigla inglés), realiza workshop hodi ko’alia kona-ba fortifikasaun disponibilidade foos iha Timor-Leste.

Tuir Diretór Nasionál Seguransa Ai-han, Rofino Soares Gusmão, inisiativa ne’e hanesan atividade regular ne’ebé organiza hosi Sekretariadu KONSSANTIL ho apoiu hosi parseiru no ajénsia nasaun unida.

Diretór Nasionál Seguransa Ai-han-MAP, Rofino Soares Gusmão. Imajen TATOLI/Francisco Sony

“Sorumutuk ne’e ho objetivu atu halo komprensivu kona-ba defisiénsia mikro nutriente, liuliu ba anemia ka raan menus no hatene aspetu tékniku atu fortifika foos iha Timor-Leste. Nune’e, objetivu seluk mak hatene estratejia disponibilidade ai-han hodi hatan ba difisiénsia mikro nutriente,” Diretór Nasionál Seguransa Ai-han hateten iha salaun Otél Novo Turismo, Lecidere, kinta ne’e.

Antes ne’e, Governu iha ona polítika ba seguransa ai-han ne’ebé iha mekanizmu no estratejia serbisu tékniku, ho asaun oinoin hodi atinje objetivu redús má-nutrisaun iha Timor-Leste, tanba tuir dadus má-nutrisaun iha Timor-Leste ba labarik atinje 47,1%

“Ho kazu má-nutrisaun boot, ita presiza prevensaun ba kada setór tanba ko’alia kona-ba kestaun ne’e la’ós halo intervenasaun ba setór ida de’it, maibé presiza konstribuisaun ema hotu no presiza iha bee-moos, estrada, ai-han, no intervensaun seluk hodi responde ba má-nutrisaun,” nia akresenta.

Notísia relevante: MS lansa planu asaun nasionál konsolidada ba seguransa ai-han

Ho hanoin ne’e, KONSSANTIL harii konsellu seguransa ba ai-han no nutrisaun hodi halo koordenasaun no konesaun setorál ba parseiru dezenvolvimentu, liña ministeriál, no ajénsia, liuhosi diskusaun hodi konsolida hamutuk forsa.

“Ita-nia produsaun rai-laran rasik loloos bele garante má-nutrisaun, maibé ita depende liu ba foos, loloos ita bele konsumu hotu hahán hanesan fehuk, ai-farina, no talas, tanba hahán hirak ne’e iha nutrisaun a’as, maibé dala barak ita depende liu ba foos de’it, entaun halo produsaun lokál menus atu responde nesesidade rai-laran,” nia tenik.

Atu halakon má-nutrisaun iha Timor-Leste, MAP nia polítika ba oin mak daudaun halo hela esforsu no hatudu katak hanesan iha 2021 produasaun hare sa’e tanba fatin natar mamuk ne’ebé uluk abandona durante tinan 10 ba kotuk, daudaun agrikultór hahú halo atividade.

“Signifika ba oin abitante barak mak sei halo tan natar no to’os, tanba tinan 2021 Governu implementa programa Cesta Bázika no Seguransa Alimentár ba kbiit laek sira, ne’ebé ita garante katak  intervensaun saida de’it mak ita halo ba futuru bele redús má-nutrisaun 47,1%, tanba ida-ne’e mak ita-nia mehi,” Diretór subliña.

Tratamentu ba má-nutrisaun

Adjuntu WFP iha Timor-Leste, Ash Roger. Imajen TATOLI/Francisco Sony

Nune’e mós, Adjuntu WFP iha Timor-Leste, Ash Roger, konsidera presiza hamenus númeru má-nutrisaun tanba taxa iha Timor-Leste a’as tebes.

“Ita bele dehan labarik ida hosi na’in-rua hetan má-nutrisaun inklui inan-feto sira, nune’e WFP ajuda Governu liuhosi Ministériu Saúde hodi halo tratamentu balun ba má-nutrisaun. Tanba ne’e, fortifika foos importante tebes atu hatan problema má-nutrisaun. Aleinde ne’e ema han foos barak liu kompara ho ai-han seluk, maibé la taka dalan ba diversifikasaun ai-han ba labarik no inan isin-rua sira, ne’ebé ita bele fó hahán proteina seluk,” nia dehan.

Tuir Reprezentante WFP, organizasaun mundiál ne’e la’ós hala’o de’it programa fortifikasaun, maibé serbisu hamutuk ho ministériu relevante sira atu koko hadi’a atitude fornese nutrisaun família.

“Tuir persentajen ne’ebé iha, Orgaizasaun Mundiál Saúde fó alarma ba situasaun má-nutrisaun iha rai ida ne’e,” nia fó hanoin.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here