Ekipa CVTL halo fomigasaun ba atuasaun kazu dengue iha bairo Becusi Sentral, loron kinta (20/01). Imajen Tatoli/Francisco Sony

DILI, 20 janeiru 2022 (TATOLI)— Ministériu Saúde liuhosi liuhosi Diresaun Nasionál Saúde Públika liuliu Departamentu Vizilaásia Epidemolojia, iha meadu janeiru ne’e, rejista pasiente dengue 647, hosi númeru ne’e na’in-14 mak mate.

“Situasaun kazu Dengue iha Timor-Leste, ohin (20/01) kazu dengue hamutuk 647 no kumulativu óbitu na’in-sia,” refere nota ne’ebé Agência TATOLI asesu, kinta ne’e.

Notísia Relevante: Prevene dengue, OMS apoia ekipamentu no aimoruk rega susuk ba MS

Maioria kazu dengue ne’e deteta hosi Munisípiu Dili ho totál 466, Baucau iha kazu 32, Manatuto ho kazu 32, Covalima ho kazu 24, Ermera ho kazu 55, Manufahi ho kazu 19, Viqueque kazu haat, Ainaro ho kazu haat, Liquiça iha kazu tolu, Aileu na’in-ida no Bobonaro kazu hitu.

Nune’e, semana dahuluk fulan-janeiru ne’e iha ona óbitu na’in-ida ne’ebé relata hosi Dili, semana datoluk kazu obitu na’in-haat hosi Ermera, na’in ida hosi Ainaro, na’in ida hosi Bobonaro no na’in- rua hosi Covalima no ohin, munisípiu Dili iha tan óbitu na’in-lima. Nune’e totál Case Fatality Rate nivél nasionál ho 2,2%.

Munisípiu Dili nafatin rejistu kazu a’as iha semana dahuluk no semana datoluk iha fulan-janeiru 2022 ho totál 466 kazu.

To’o ohin loron semana dahaat fulan janeiru, posto administrativu Dom Alexo relata kazu totál 224, Cristo Rei ho kazu 92, Vera-Cruz ho totál kazu 74, Nain Feto ho totál kazu 73, ne’e hatudu katak kada loron  kazu espalla nafatin ba iha postu administrativu sira seluk.

Nune’e mós fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue hamutuk 126, klínika Fatumeta na’in-63, Sentru Saúde Comoro 98, Sentru saúde Vera-Cruz 47, Sentru Saúde Formoza 76, Sentru Saúde Becora 48, Sentru Saúde Metinaru haat, Klínika Bairru-pité rua no Klínika Motael na’in-ida.

Apela ba populasaun

MS apela ba populasaun iha Dili laran no mós iha munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka  sente laran sa’e,liman ain no sikun moras hodi bele hetan atendimentu hosi profisionál saúde sira.

Apela mos ba populasaun iha Dili laran no mós iha munisipiu sira seluk atu koopera ho autoridade lokál halo limpeza jerál iha suko no bairru liuliu  fase tanke, bidon ka balde tau bee semana ida dala ida.

Hamoos sasán ka limpeza hanesan roda aat, bazu ai-funan atu susuk labele tau tolun, haloot ropa ho di’ak iha ita nia uma laran, uza ropa ne’ebé liman naruk karik toba iha tempu loron, uza aimoruk hanesan repelente ka autan, uza muskitéiru karik toba iha tempu loron no so’e lixu iha nia fatin.

Notísia Relevante: Pasiente dengue rekuperadu na’in-204, presiza asaun rega susuk

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here