CNE halo formasaun ba funsionáriu sira kona-ba prosedimentu apuramentu nasionál no Dekretu Governu ba Eleisaun Prezidensiál, iha salaun apuramentu nasionál CNE, kinta (20/01). Imajen TATOLI/Francisco Sony

DILI, 20 janeiru 2022 (TATOLI)–Komisaun Nasionál Eleisaun (CNE, sigla portugés), kinta ne’e, kapasita funsionáriu liuhosi formasaun durante loron rua (kinta no sesta) hodi prepara ba Eleisaun Prezidensiál períodu 2022-2027, ne’ebé sei realiza iha marsu tinan ne’e.

Tuir Vise-Prezidente CNE, Domingos Barreto, formasaun ne’e foku liu ba prosedimentu apuramentu nasionál no Dekretu Governu Eleisaun Prezidensiál.

“Formasaun ne’e hanesan hanesan atividade sira ne’ebé hala’o ona tanba Prezidente Repúblika dekreta ona loron Eleisaun Prezidensiál, tanba ne’e maka orgaun eleitorál rua hanesan CNE no Sekretariadu Tékniku Administrasaun Eleitorál (STAE) dadaun ne’e halo hela preparasaun no formasaun ne’e haree liu kona-ba Dekreu Governu ne’ebé foin lalais aprova ona,” Vise-Prezidente hateten iha salaun CNE, Caicoli, kinta ne’e.

Nune’e, partisipante hosi funsionáriu CNE hosi nasionál no kada munisípiu reprezenta na’in-haat.

“Hosi formasaun ne’e funsionáriu sira bele iha koñesimentu liután hodi superviziona no hatene liu papél ba-oin atu halo saida,” nia akresenta.

Notísia relevante: Governu altera regulamentasaun hosi Lei Eleitorál Prezidente Repúblika 

Kona-ba preparativu sira, CNE realiza ona reuniaun ho STAE ligadu ho imprime buletin votu, tinta no preparasaun tékniku sira seluk.

Aleinde ne’e, orgaun eleitorál rua halo ona diskusaun kona-ba debate públiku ba kandidatura sira, ne’ebé tuir planu sei uza salaun CNE hodi realiza debate.

“Ami halo ona diskusaun, tinan hirak liubá uza salaun CNE, ne’ebé tinan ne’e mós hanesan sei uza salaun ne’e no mekanizmu debate mak sei deside hikas iha reuniaun sira tuir-mai,” nia dehan.

Enkuantu, foin lalais ezekutivu sira liuhosi Konsellu Ministru halo ona alterasaun ba Dekretu Governu hamutuk 10 relasiona ho Eleisaun Prezidensiál.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here