Logotipu FFTL. Imajen/Espesiál

DILI, 20 janeiru 2022 (TATOLI)–Prezidente Asosiasaun Futeból Viqueque, Cosme Sarmento, hateten, daudaun ne’e parte asosiasaun seidauk define atu hili kandidatu Prezidente Federasaun Futeból Timor-Leste (FFTL) foun ba períodu 2022-2026.

Daudaun ne’e, iha ona kandidatu tolu hanesan Eis Prezidente FFTL Francisco Kalbuady Lay, propoin hosi asosiasaun tolu, atuál Prezidente FFTL Francisco Jerónimo, propoin hosi asosiasaun ida no atuál Prezidente Liga Futeból Timor-Leste Nilton Telmo Gusmão, propoin hosi asosiasaun ida, ne’ebé kandidatu tolu ne’e hahú kompleta ona dokumentu atu kompete iha Kongresu VIII iha loron 26 fevereiru.

“Ami agora independente hela, ne’ebé seidauk deside atu apoiu kandidatu ruma. Ami sei tetu hela. Iha ekipa susesu hosi kandidatura na’in-tolu ne’e mai ko’alia ona ho ha’u, maibé ha’u seidauk tuur hamutuk ho sira tanba ami sei iha hanoin balun, bainhira ita apoiu ba kandidatu ida signifika ita la neutru ona. Tanba ne’e maka ami lakoi tuur ho ekipa susesu sira,” Prezidente Asosiasaun hateten ba Agência TATOLI, via telefónika, kinta ne’e.

Notísia relevante: Kalbuady, Francisco no Nilton hahú kompleta dokumentu kompete ba Prezidente FFTL

Maski nune’e, Cosme Sarmento, nota katak kandidatu tolu iha interese no kapasidade kuaze hanesan.

“Ami sei difine ema ida ne’ebé di’ak liu. Ba oin ami sei hili ida hodi lidera FFTL, ne’ebé ami sei rona sira kampaña iha tempu kongresu maka ami foin deside,” nia subliña.

Biban ne’e, nia husu ba kandidatu na’in-tolu, bainhira asume knaar hanesan Prezidente FFTL karik presiza hasa’e subsídiu ba asosiasaun futeból sira hotu, tanba subsídiu ne’ebé agora daudaun aloka ba asosiasaun sira kiik liu.

“Subsídiu ne’ebé Asosiasaun Futebol Viqueque hetan kada fulan ida $1.000, ne’ebé ba tinan ida hamutuk $12.000 hodi sustenta ba atividade asosiasaun nian iha Viqueque,” nia akresenta.

Jornalista  : Vitorino Lopes da Costa       

Editóra      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here