CNE realiza edukasaun sivika ba prizioneiru sira iha prizaun Covalima. Imajen Tatoli/Celestina Teles.

DILI, 19 janeiru 2022 (TATOLI)—Sekretáriadu Tékniku Administrasaun Eleitorál (STAE) fasilita ona dadur sira iha prizaun Covalima ne’ebé laiha kartaun eleitorál, hodi halo kartaun eleitóral nune’e bele ezerse sira-nia direitu votu iha eleisaun prezidensiál 2022.

Notísia Relevante: STAE sei fasilita dadur iha prizaun Covalima halo kartaun eleitorál

“Ha’u orienta ona tékniku sira hodi halo identifikasaun katak dadur na’in-50 mak seidauk rejistu no atualiza kartaun eleitorál falta loron tolu ka haat, atu taka resensiamentu eleitorál iha 14 janeiru 2022. Ha’u orienta diretór asuntu baze dadus nian no diretór STAE Covalima, sira mobiliza kedas ekipamentu rejistu nian no atualiza hotu ona,” Diretór Serál STAE, Acilino Manuel Branco, informa ba Agência Tatoli, iha nia knar fatin, Caicoli, Dili, kuarta ne’e.

Nia informa, dadur balun ne’ebé mak sira-nia kartaun eleitorál lakon no balun hosi munisípiu Covalima no balun mai hosi minisípiu seluk, STAE fasilita ona dadur sira hodi hasai kartaun eleitorál nune’e sira bele ezerse sira-nia direitu votu.

“Bazea ba prosedimentu, ita halo ona atendimentu ba sira hodi hasai kartaun eleitorál,” nia hateten.

Diretór STAE Munisípiu Covalima, Francisco Gusmão klarifika, tékniku STAE Covalima halo ona atendimentu hodi fasilita dadur sira iha prizaun Covalima ne’ebé sira-nia kartaun eleitorál lakon ne’e, hasai hotu kartaun eleitorál foun.

“Bazea lista ne’ebé mak ami simu hosi prizaun Covalima kuaze dadur 50-resin mak laiha kartaun eleitorál. Maibé hafoin STAE halo verifikasaun maioria iha hotu kartaun eleitorál,” nia informa.

Ekipa tékniku STAE Covalima hala’o ona atendementu ba dadur sira-ne’ebé mak laiha kartaun eleitorál iha loron 12 fulan-janeiru ne’e, bazea ba dadus hosi prizaun dadur na’in 50-resin maibé hosi númeru ne’e STAE identifika ona dadur na’in-sia (9) no hosi númeru ne’e na’in-ida (1) eleitór foun no na’in-ualu (8) atualiza dadus.

Enkuantu bazea ba kalendáriu, STAE hahú halo resensimentu eleitorál iha fulan-janeiru 2021 ne’ebé konklui ona iha loron 14 fulan-janeiru tinan 2022.

Ho nune’e, STAE Covalima rejista ona eleitór provizoriu hamutuk 4.441 no hosi númeru ne’e, eleitór foun 2.609 no eleitór atualizasaun baze dadus (ABD) 1.832, ne’ebé seidauk inklui dadus antes iha sistema STAE ne’e hamutuk 47.961 provizóriu hodi aumenta tan 100-resin de’it ona hodi aumenta tan dadus atuál 2021 nian.

Antes ne’e, iha loron 23 fulan-novembru 2021, diretór prizaun Covalima Julio dias Ximenes aprezenta dadus dadur iha prizaun Covalima hamutuk 108 ne’ebé kompostu hosi prizaun kondenadu na’in-70 no prizaun preventiva na’in-38.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here