Primeiru Ministru, Taur Matan Ruak, akompaña hosi Autoridade RAEOA asina plaka ba projetu foun ne'ebé inaugura. Imajen mídia ZEEMS.

DILI, 19 janeiru 2022 (TATOLI) – Primeiru Ministru, Taur Matan Ruak, tersa ne’e inaugura konstrusaun eskola foun hamutuk unidade sia (9) iha Rejiaun Administrativa Espesiál Oé-Cusse Ambeno (RAEOA).

Nune’e mós projetu gabiaun ida no projetu perfurasaun bee-moos ida iha Rejiaun Administrativa Espesiál Oé-Cusse Ambeno (RAEOA).

Xefe Governu inaugura projetu foun hamutuk unidade-11 ne’e, autoridade ezekuta planu no programa RAEOA nian iha 2021, ne’ebé perténsia sub-rejiaun haat iha teritóriu Oé-Cusse.

Nune’e projetu eskola-sia (9) ne’e iha sub-rejiaun Oésilo, harii Eskola Bázika Sentrál (EBC, sigla portugés) Tasaebeno, ezekuta hosi empreza Sunilake-Sombai Unipesoál Lda, ho valór kontratu $60,497.26, no Eskola Bázika Filiál (EBF) Buqui, ezekuta hosi empreza molo Unipesoál Lda, ho valór kontratu $86,733.47 perténsia iha suku Usitasae.

Iha sub-rejiaun Pante Makasar harii Eskola Pré-Eskolár (EPE) Atoni-Oé-Cusse, ezekuta hosi empreza Elbenitu Unipesoál Lda ho valór kontratu $73,332.45, Eskola Bázika Filiál (EBF) Noapai inklui kántina ida, ezekuta hosi empreza Neldy Unipesoál Lda, ho valór kontratu $46,567.80, perténsia suku Cunha, Eskola Sekundária Jerál (ESG, sigla portugés) Baqui iha suku Naimeco, ezekuta hosi empreza Matlalan Unipesoál Lda, ho valór kontratu $69,778.84.

Iha sub-rejiaun Nítibe, harii Eskola Bázika Filiál (EBF) Oénunu, iha suku Suni-Ufe ezekuta hosi empreza Rainha-Mena Unipesoál Lda, ho valór kontratu $85,557.65, no Eskola Bázika Sentrál (EBC, sigla portugés) Banaefmanat, iha suku Ban-Afi, ezekuta hosi empreza Neon-Bahan Unipesoál Lda, ho valór kontratu $63,841.03.

Iha sub-rejiaun Pássabe Eskola Téknika Vokasionál São João Paulo Segundu, iha suku Abani, ezekuta hosi empreza Neon-Mantaen Unipesoál Lda, ho valór kontratu $104,817.69.

Xefe Governu mós halo inaugurasaun mós ba projetu Gabiaun Maumate iha suku Naimeco sub-rejiaun Pante Makasar, ne’ebé ezekuta hosi empreza Lifau Indah Unipesoál Lda, ho valór kontratu $545,308.50, inklui projetu perfurasaun bee-mos Noa-Ana iha suku Lela-ufe sub-rejiaun Nítibe, ezekuta hosi empreza Am-Lhichoe unipesiál ho valór kontratu $494,727.59.

“VIII Governu tau atensaun ba ema-nia vida, Prezidente Autoridade ho nia ekipa hatuur no hadi’a projetu barak, maibé konsentra uluk ba eskola, bee-moos, klínika no agrikultura,” Primeiru Ministru Taur Matan Ruak, hateten bainhira vizita ofisiál iha Oé-Cusse.

Entretantu, Prezidente Autoridade RAEOA, Arsénio Paixão Bano, agradese ba Xefe Governu nia vizita ba povu Oé-Cusse.

Nia dehan, projetu hirak-ne’e realiza iha situasuan difisíl tanba iha COVID-19, programa preoridade dahuluk no esforsu tomak konsege ultrapasa tanba iha kampaña vasinasaun ba doze dahuluk atinje ona 72% no doze daruak 80% resin.

“Maibé Autoridade kontinua servisu, perfurasaun bee-moOs iha fatin fatin, konstrusaun eskola iha suku hotu-hotu, melloramentu estrada rurál, no programa barak iha setór agrikultura, konserva bee-metan sira, harii Gabiaun atu proteje área produtiva sira, konstrusaun ba postu UPF no loke estrada foun, no kompleta liña eletrisidade iha sub-rejiaun haat iha teritóriu Oé-Cusse,” Arsénio informa.

Entretantu, iha vizita Xefe Governu ne’e hala’o durante loron ida, no ikus ensera ho diskusaun  diálogu aberta ho xefe suku no xefe aldeia sira, jestor sub-rejiaun no komunidade sira iha rejiaun ne’e.

Jornalista         : Abílio Elo Nini
Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here