Funsionáriu Palasiu Prezidensia simu vasina Boster husi pesoál saúde sira, segunda, 17/1/2022.imajen TATOLI/Antonio Dasiparu

DILI,19 janeiru 2022 (TATOLI)— Diretora Servisu Saúde Munisípiu Dili, Agostinha Segurado, informa Ministériu Saúde fó ona vasina datoluk ba liña frente atu reforsa imunidade kontra coronavirus SARS-CoV-2 iha munisípiu Dili hamutuk 4.226.

“Hahú iha loron 4 to’o 8 janeiru, ita fó ona doze datoluk vasina booster Pfizer ba ema hamutuk 4.226.  pesoál hirak ne’e mai hosi profisionál saúde, pesoál seguransa, member Governu, idozu sira no ema ho moras komorbidade sira,” Diretora ne’e ateten ba jornalista sira iha Sentru Internamentu Vera-Kruz, kuarta ne’e.

Iha loron 10 janeiru, ekipa saúde destakadu kontinua vasina ba labarik idade 12 no menus hosi idade 18. Vasina ne’e depende mós ba pedidu hosi entidade Estadu, hanesan Instituisaun Prezidensia Repúblika, no Prokurador Jerál Repúblika.

“Ita atende ba iha labarik sira, maibé sira la mai ita atende fali ba iha liña frente sira. La’ós rutina tanba ita-nia vasina ne’e sei implementa fali 31 janeiru.   Bainhira vasina sufisiente mak bele kobre hotu ema ne’ebé mak hakarak,” nia akresenta.

Diretora Agostinha subliña to’o oras ne’e, estudante ne’ebé simu ona vasina Pfizer doze dahuluk hamutuk 36.000, enkuantu doze daruak 29.000

Kona-ba progresu imunizasaun iha territóriu nasionál, liuliu ema ne’ebé simu ona vasina doze dahuluk atinje ona 83,9% no doze daruak 70%.

Timor-Leste rejista kazu ativu 15, kumulativu kazu konfirmadu 19.866, kumulativu rekuperadu 19.729 no óbitu na’in-122.

Notísia Relevante: COVID-19: kazu detetadu pozitivu ida no ativu 15

Jornalista : Felicidade Ximenes

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here