Diretór Sentru Treinamentu Vokasionál Juventude (STVJ) Comoro, Norberto da Costa (klaran), hasai retraru hamutuk ho benefisiáriu sira. Imajen/Doc. STVJ Comoro.

DILI, 19 janeiru 2022 (TATOLI)—Ministériu Turizmu, Komérsiu no Indústria (MTCI, sigla portugés) liuhosi MTCI, liuhosi Diresaun Nasionál Empreendedorizmu Atividade Produtu Turistiku fó apoia $17.000 ba Sentru Treinamentu Vokasionál Juventude (STVJ) Comoro hodi hala’o formasaun movel kona-ba prosesamentu ai-han lokál iha munisípiu Ainaro no Aileu.

Diretór Sentru Treinamentu Vokasionál Juventude (STVJ) Comoro, Norberto da Costa, hateten formasaun ne’e realiza iha dezembru 2021, ho objetivu oinsá atu bele dezenvolve ai-han lokál sira iha Timor-Leste.

“Formasaun ne’e atu kapasita ita-nia formandu sira, atu sira bele prepara an tanba sira hanesan suku ne’ebé eskolla nu’udar suku pilótu ba turizmu komunitáriu iha Timor-Leste,” Norberto da Costa hateten ba Agência Tatoli, iha nia knaar fatin, Comoro, Dili, kuarta ne’e.

Formasaun ne’e finaliza ona iha fulan dezembru tinan 2021 ho durasaun loron tolu iha kada suku ne’ebé kompostu hosi suku Seloi Kraik, Nunumoge no Maubisse Vila, ho totál partisipante hamutuk 47.

Tuir planu, distribuisaun sertifikadu ba partisipante sira sei hala’o iha 25 ka 26 fulan-janeiru, maibé ida-ne’e STVJ Comoro sei halo koordenasaun ho Ministériu Turizmu, Komérsiu no Indústria.

Formadora Sentru Treinamentu Vokasionál Juventude (STVJ) Comoro, Aderita M. aa Costa, hateten formasaun movel kona-ba prosesamentu ai-han lokál mak hanesan oinsá prosesa fehuk Europa no feruk midar sai fali ba kripik ka sai fai fali bolu.

Aleinde ne’e, iha formasaun ne’e sei halo mós salada ne’ebé uza koto nurak, señora no fehuk Europa sai fali ba salada vegetárian ho soupa hodi bele sai hanesan hahan kmaan ne’ebé sai hahan loke nian molok atu almoco ka jantar.

“Ami halo mós ba iha hahan menu prinsipál mak hahan ne’ebé halo bosu. Entaun, hahan ne’e ami halo hosi naan manu broiler ho fehuk midar, ida-ne’e ami halo sai fali ba hahan bosu nian. Hosi ne’e, ami halo mós ba hahan taka nian, ne’ebé ema dehan hahan fase ibun, ida-ne’e ami halo menu coconout hosi fehuk midar sai fali ba iha hahan sobre meza,” nia esplika.

Jornalista : Nelia Fernandes

Editór       : Cancio Ximenes

 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here