Prosesu konstrusaun Eskola Bukoli Baucau. Imajen/Espesiál

DILI, 19 janeiru 2022 (TATOLI)–Ministériu Edukasaun Juventude no Desportu (MEJD) liuhosi Diresaun Nasionál Asaun Sosiál Eskolár (DNASE), rezolve ona kondisaun Eskola Ensinu Báziku Filiál (EBF) Bukoli, iha munisípiu Baucau, hodi garante hikas prosesu ensinu aprendizajen.

Diretór Nasional Asaun Sosiál Eskolár, Joaquim Martins, relata, eskola ne’e hetan estragu hosi dezastre naturál iha loron 21 dezembru 2021 liubá, maibé hetan intervensaun hosi MEJD liuhosi ekipa DNASE nian tun halo kedan verifikasaun hodi foti dadus iha loron 23 dezembru.

“Ami iha koordenasaun di’ak ho autoridade lokál, koordenadór eskola inklui komunidade, ne’ebé tuir informasaun materiál ne’ebé ami distribui ba sira konsege reabilita no ramata ona, nune’e bele garante katak prosesu ensinu aprendizajen ba EBF Bukoli bele hahú hikas hanesan baibain,” Diretór Joaquim Martins informa ba Agência TATOLI, iha ninia knaar fatin, MEJD Villa-verde, kuarta ne’e.

Notísia relevante: MEJD prontu apoiu materiál emerjénsia ba eskola EBF Bukoli

Eskola Bukoli hetan estragu maka’as iha parte kakuluk, tanba ne’e MEJD fó apoiu materiál emerjénsia.

Apoiu materiál emerjénsia ne’ebé ministériu oferese mak hanesan kalen 300, kalen lizu metru 30, ai ho medida 6x12m unidade 50, ai ho medida 5x50m unidade 50, pregu 15cm kilograma 15, pregu 10cm kilograma 15 no pregu kalen kilograma 20.

“Ho nune’e, ami agradese tebes ba autoridade lokál iha Bukoli tanba bele halo koordenasaun di’ak ho koordenadór eskola inklui komunidade hodi konklui obra ba eskola ne’e iha loron 17 janeiru,” nia akresenta.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here