Diretór Jerál Servisu Rejistu Notariadu-Ministériu Justisa, Crisogno da Costa Neto. Imajen Tatoli/Francisco Sony

DILI, 19 janeiru 2022 (TATOLI)— Kandidatu Prezidente Repúblika na’in-ualu konfirma sidadania iha Ministériu Justisa liuhosi Diresaun Jerál Servisu Rejistu no Notariadu (DGSRN, sigla portugés), hafoin ba rejista iha Supremu Tribunál ba Justisa (STJ).

“Ami la’ós halo rejistu, ami la halo inskrisaun ba kandidatu prezidente Repúblika nian, maibé ami halo deit autentifikasaun ka konfirmasaun ba sira nian dokumentu, tanba ne’e dokumentu ne’ebé ami simu ona hosi kandidatu sira, hahú horiseik (18/01) mak nain-lima no ohin (19/01) mak nain-tolu, nune’e kandidatura na’in-ualu mak konfirma nia dokumentu,” Diretór   Jerál DGSRN, Crisogno da Costa Neto, hateten ba jornalista sira iha nia knaar fatin-Colmera, kuarta ohin.

Kandidatu na’in-ualu ne’e kompostu hosi kandidatura sira ne’ebé deklara-an independente mak  Isabel da Costa Ferreira, Milena Pires, Constáncio Pinto, Antero Benedito da Silva, Felisberto Araújo Duarte, Tenente Jenerál Lere Anan Timur.

Enkuantu kandidatura mai hosi partidu polítiku mak atuál Prezidente Repúblika, Francisco Guterres Lú-Olo, hosi partidu FRETILIN no mós atuál Vise Primeiru Ministru ba Asuntu Sosiál, Amanda Berta dos Santos, hosi partidu KHUNTO.

Prosesu autentifikasaun ka konfirmasun ne’e bazeia ba Lei númeru 15/2021, 14 de Jullu, sesta alterasaun ba lei númeru 7/2006, 28 dezembru, kona-ba Eleitorál ba Prezidente Repúblika, ne’ebé sita iha artigu 17° kona-ba rekezitu formál sira ba aprezentasaun kandidatura.

Númeru 3 hosi artigu 17 ne’e, esplika deklarasaun ne’e aneksa ho fotokopia kartaun eleitór ne’ebé konfirmadu, no dokumentu hosi kandidatura ne’ebé hetan ona aprovasaun.

Nune’e mós númeru 3 aliña a fó dalan ba sidadaun ne’ebé ho idade mínimu tinan 35 no sidadaun timor-oan originál.

“Ami iha ne’e só halo deit autentifiksaun ba sira nian dokumentu kópia kartaun eleitorál no dokumentu deklarasaun, hafoin ida ne’e kandidatura sira submete sira nia inskrisaun ba Supremu Tribunál Justisa, ne’ebé ita nia iha ne’e Tribunál Rekursu,” Diretór Jerál ne’e afirma.

Tuir nia, kandidatura na’in-ualu ne’e prenxe ona rekezitu hotu atubele hala’o rejistu iha Supremu Tribunál Justisa tuir kompeténsia legál.

“Sira (kandidatu Prezidente na’in-ualu) ne’e prenxe ona rekezitu tuir ami nia autentikasaun  entermus dokumentu sira no nia apoiante sira.  Tanba kandidatu balun nia apoiante na’in-5.000, na’in-6.000 no balun na’in-100.000,” Crisono da Costa esplika.

Diretór Jerál ne’e dehan kontinua hein kandidatu Prezidente Repúblika seluk ne’ebé posibilidade sei aprezenta dokumentu atu halo konfirmasaun.

Notísia Relevante: Tribunál Rekursu simu lista kandidatura PR to’o 04 fevereiru

Jornalista : Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here