Primeiru Ministru, Taur Matan Ruak, prezide reuniaun Konsellu Ministru, iha Palásiu Governu, segunda (22/09). Imajen TATOLI/Francisco Sony

DILI, 19 janeiru 2022 (TATOLI)–Governu liuhosi reuniaun Konsellu Ministru iha kuarta ne’e, deside renova mandatu membru Konsellu Administrasaun Institutu Nasionál Seguransa Sosiál (INSS) ba tinan-tolu tan.

Projetu Rezolusaun Governu aprezenta hosi Vise Primeira-Ministra no Ministra Solidariedade Sosiál no Inkluzaun (MSSI), Armanda Berta dos Santos.

“Longuinhos Armando Leto, mantein hanesan Prezidente Konsellu Administrasaun INSS, enkuantu Azevedo Marçal no Cornélio Barros kontinua kargu Vogál, Alberto Carvalho de Araújo no Ramalho da Costa mantein hanesan reprezentante empregadór no traballadór,” Ministru Prezidénsia Konsellu Ministru, Fidelis Manuel Leite Magalhães, informa, hafoin reuniaun ezekutivu, iha Palásiu Governu, kuarta ne’e.

Antes ne’e, prezidente no membru Konsellu Administrasaun INSS hirak ne’e simu pose hodi dirije no jere serbisu iha área Seguransa Sosiál iha loron 22 janeiru 2019.

Iha fatin ketak, Prezidente Konsellu Administrasaun INSS, Longuinhos Armando, komprometidu prontu lidera instituisaun Estadu ne’e.

“Agradese ba Nai-ulun sira ne’ebé fó fiar ba ami atu jere nafatin instituisaun ne’e. Ami sei serbisu másimu nafatin atubele fó buat di’ak ba traballadór-sira tanba INSS ne’e Governu harii atu asegura traballadór sira iha futuru bainhira tama iha vida reforma, tanba ne’e ami prontu nafatin atu hala’o knaar,” Longuinhos Armando otomista. 

Enkuantu, mandatu ba períodu dahuluk hahú iha tinan 2019 no sei ramata iha dezembru 2022, nune’e ba períodu daruak ne’e sei ramata iha tinan 2025. 

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here