Komandante PNTL munisípiu Dili, Superientendente Xefe Polisia, Henrique da Costa. Imajen TATOLI/Francisco Sony

DILI, 19 janeiru 2022 (TATOLI)—Inspesaun Jerál Polísia Nasionál Timor-Leste (PNTL) hamutuk ho Departamentu Justisa, halo operasaun konjunta, kuarta ne’e ba Komandu munisípiu Dili hodi haree fatin rai no utilizasaun arma ne’ebé membru uza ba serbisu.

“Ohin ekipa konjunta halo inspesaun hodi haree utilizaun arma ne’ebé rejista tama no sai, operasionál, no kazu disiplinár ne’ebé rejista, ne’ebé nota katak serbisu la’o di’ak tebes, liuliu liga ho utilizasaun arma,” Komandante PNTL munisípiu Dili,  Superintendente Xefe  Polísia, Henrique da Costa, hateten iha edifísiu Inspesaun Jerál Estadu, Lecidere.

Enkuantu, kona-ba armáriu rai arma iha Komandu Dili ho kondisaun di’ak, tanba iha tinan kotuk hetan apoiu hosi parseiru sira hodi konstrui armáriu.

Tuir dadus, totál membru Polísia ne’ebé serbisu iha Komandu Dili hamutuk 517, maibé daudaun balun ho kondisaun moras.

“Komandu munisípiu Dili deside hasai tanba balun abandona serbisu no balun ba apoiu serbisu iha fatin seluk, entaun daudaun ne’e dadus efetivu ne’e hamutuk 494,” nia akresenta.

Iha biban hanesan, Inspetór Gabinete Inspesaun PNTL, Superintendente Xefe Polísia, Carlos Jerónimo, hateten, atividade inspesaun ne’ebé hala’o nu’udar knaar Gabinete Inspesaun Jerál PNTL ne’ebé sempre halo tinan-ida dala-rua.

“Atividade ne’e kompostu hosi inspesaun ordinária no estraordinária ne’ebé ba munisípiu sira seluk halo ona, maibé ba Dili iha unidade balun mak seidauk halo, entaun ohin ita foin halo inspesaun hodi haree fatin arma no kondisaun sira seluk,” Superintendente Xefe Carlos Jerónimo, dehan.

Durante inspesaun, membru sira konsege deteta lakunas balun, ne’ebé bele utiliza hodi hadi’a no balun tenke aprezenta ba Komandu Jerál hodi foti solusaun.

“Membru sira durante ne’e uza arma tuir regra, balun mak ladún kompreende maibé ita fó atensaun ba sira-nia Komandante sira hodi bele halo aprosimasaun nune’e bele iha mudansa,” nia akresenta.

Aleinde ne’e, identifika armáriu rai arma iha munisípiu balun ho kondisaun kloot no tau hamutuk ho sasán administrasaun.

“Tanba ne’e, persiza duni fatin balun hodi tau arma sira, nune’e bele prezerva materiál sira ne’e hotu ho di’ak. Maibé problema sira ne’e hotu ita hato’o ba Komandu Jerál hodi tau ba konsiderasaun tanba kuaze munisípiu sira hasoru hotu situasaun hanesan armáriu ho kondisaun ladún di’ak,” nia dehan.

Jornalsita : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here