Ilustrasaun ema tuir formasaun. Imajen/Espesiál.

DILI, 18 janeiru 2022 (TATOLI)—Sentru Nasionál Formasaun Profisionál (SENAI) Becora planeia atu kapasita profesór hamutuk 42 tanba orsamentu 2022 ne’ebé aloka $6.000-resin ba sentru ne’e inklui ona ho atividade.

Diretór interinu SNFP Becora, Fernando Araújo, hateten, tinan ne’e sira iha planu prioridade atu hasa’e kapasidade profesór ka formadór, bazeia ba ezijénsia Institutu Nasionál Dezenvolvimentu Mão de Obra (INDIMO) atu prepara estudante sira di’ak liután iha futuru.

“Profesór 42, antes ne’e hetan ona kapasitasaun iha nível 1 to’o 4 tuir padraun INDIMO, ne’ebé sira prienxe ona kritéria hanesan formadór, maibé sentru formasaun nafatin hasoru obstákulu liu-liu ba formadór sira. Ita hakarak sira bele iha koñesimentu di’ak liután atu prepara estudante sira ba futuru hodi bele kompete iha merkadu traballu nasionál no internasionál,” Diretór Interinu hateten ba Agência TATOLI, iha ninia knar fatin, tersa ne’e.

Nune’e, Fernando Araújo konsidera Timor-Leste presiza garante kualidade profesór ka formadór sira iha nível koñesimentu hodi prepara fali estudante sira kompete iha merkadu traballu nível internasionál iha futuru.

Iha parte seluk, Sentru Becora presiza halo mudansa iha buat barak tenke no hadi’a inklui hasa’e koñesimentu profesór sira tanba Estadu no Governu buka hela meiu atu lori nasaun integra iha nível rejionál hanesan atu sai membru organizasaun mundiál ba komérsiu no organizasaun seluk tan.

“Ita hatene Estadu Timór buka hela dalan atu ita bele sai membru Asosiasaun Nasaun Sudeste Aziátiku (ASEAN, sigla inglés) no parte Ministériu Koordenadór Asuntu Ekonómiku (MKAE) prepara bele sai membru organizasaun mundiál ba komérsiu,” nia akresenta.

Tanba ne’e, presiza traballadór sira ne’ebé ho abilidade boot ne’ebé bele kompete iha nível internasionál.

“Entaun Governu presiza tau atensaun di’ak liután atu kapasita uluk profesór kualifikadu atubele prepara fali estudante,” nia dehan.

Enkuantu, Sentru Formasaun kontinua programa hanesan baibain iha área pedreiru, karpinteiru, soldadeiru, kanalizasaun no eletrisidade.

Daudaun ne’e, Sentru SENAI Becora inklui estudante hosi Beaço, Viqueque nia estudante hamutuk 360 iha formasaun, ne’ebé finaliza ona formasaun no tama ona iha faze estájiu.

“Ba sira ne’ebé tuir estájiu sei iha fulan ida ba prátika, fulan depois sei halo fali avaliasaun hotu mak foin tama iha prosesu sertifikadu. Ne’e hatudu katak estudante sira ne’ebé hetan ona sertifikadu bele kontinua buka serbisu ou bele hadi’a tan kapasidade formasaun tuir mai,” nia tenik.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here