Prezidente CDTL, Macario Sanches. Imajen/ Media CDTL

DILI, 18 janeiru 2022 (TATOLI)– Sekretáriu Estadu Juventude no Desportu (SEJD) Abrão Saldanha, tersa ne’e, hasoru malu ho Prezidente Konferedasaun Desportiva Timor-Leste (CDTL-sigla Portugés), Macario Sanches ho nia estrutura hodi aprezenta planu no programa ba área desportiva iha Timor-Leste.

“Reuniaun ho estrutura foun CDTL tanba sira mai aprezenta sira nia estrutura foun ho nia planu ne’ebé mak atu realiza iha tinan ida ne’e. Nune’e Governu apresia sira nia planu no inisiativa sira hotu,” Sekretáriu Estadu ne’e hateten ba jornalista-sira iha edifísiu SEJD-Lecidere, tersa ne’e.

Notísia relevante: SEJD koordena ho CDTL hodi haree planu 2022

SEJD louva programa CDTL iha Governu tanba aliña ho programa prioridade SEJD nian atu reforsa federasaun desportiva sira iha Timor-Leste.

Sekertáriu Estadu Jobentude no Desportu (SEJD), Abrão Saldanha. Imajen Tatoli/Antonio Dasiparu

“Ami diskute buat lubuk ida no konkorda malu hodi ko’alia saida mak presiza rezolve iha kada trimestre, sa rezultadu mak ita hetan iha tinan ida nia laran no sira hotu konkorda,” nia dehan.

Iha fatin biban hanesan, Prezidente CDTL, Macario Sanches, informa iha 2022 ne’e, planu prioridade mak atu hakbiit federasaun hotu ne’ebé hamahan an iha CDTL nia okos.

Prezidente CDTL ne’e akresenta iha nia mandatu sei hamutuk ho membru sira implementa programa importante mak promove federasaun hotu la haree ba kór no saida de’it, tau federasaun hotu iha oin, hodi bele promove mós foinsa’e sira-nia talentu iha modalidade oi-oin.

“Ita sei promove federasaun sira hotu. Ba federasaun sira-ne’ebé antes ne’e fó ona prestasaun di’ak no oferese medalla ba Timor-Leste ita kaer metin nafatin, ba federasaun ne’ebé antes ne’e seidauk iha prestasaun di’ak ita sei promove nafatin atu sira bele iha vontade atu hakaas an nafatin no tau federasaun hotu iha liña ne’ebé mak hanesan,” nia akresenta.

Alende ne’e, nia dehan programa seluk mak atu fortalese administrasaun CDTL nian, halo modernizasaun administrasaun atu iha kapasidade naton atubele atende federasaun sira.

“Ita nia kapasidade metin, organizasaun ne’e forte mak foin bele lidera federasaun hotu ho di’ak. Ita haree federasaun balun ho sira-nia atleta nivél olympico, entaun ita tenke koopera di’ak ho Komite Olimpíku Nasionál Timor-Leste, tanba sira mak sei lori atleta sira-ne’e ba kompete iha li’ur. Entaun, ita tenke iha komunikasaun di’ak ho sira, nune’e mós Governu tanba durante ne’e investimentu ba desportu úniku so Governu entaun ita tenke liga sira hamutuk,” nia afirma.

Macario Sanches eleitu ba Prezidente CDTL periódu 2021-2025 liuhosi asembleia jerál ne’ebé realiza iha salaun Xanana Sport Centre Dili, iha 11 dezembru foin-lalais ne’e hodi troka Prezidente sesante Afranio Xavier Amaral ne’ebé mandatu termina ona.

Lospalos oan ne’e eleitu tanba hetan fiar hosi federasaun hotu ne’ebé hamahan an iha organizasaun CDTL, liuhosi kongresu kompete ho pakote B hasoru pakote A ne’ebé lidera hosi Afranio Xavier Amaral.

Bainhira votasaun Macario hetan votu hamutuk 14 hosi federasaun hamutuk 25 ne’ebé partisipa iha asembleia jerál ne’e no Afranio hetan de’it votu ida.

Notísia relevante:Estrutura CDTL foun sei hakbiit liután federasaun hotu

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here