Diretór Servisu Edukasaun Munisípiu Baucau, Augosto Hornai Ximenes. Imajen TATOLI/Natalino Belo.

BAUCAU, 18 janeiru 2022 (TATOLI) – Servisu Edukasaun munisípiu Baucau fó-sai katak, prosesu aprendizajen tinan letivu 2022 nian iha munisípiu refere sei hahú aula prezensiál iha loron 31 janeiru.

Diretór Servisu Munisipál Edukasaun Baucau, Augosto Hornai Ximenes, esplika, bazea ba karta sirkulár hosi Ministériu Edukasaun, Juventude no Desportu (MEJD) atu hahú halo preparasaun hanesan antes hahú atividade aula prezensiál.

“Tuir kalendáriu foun hosi MEJD fó-sai ne’e inísiu atividade eskolár aula prezensiál iha loron 31 janeiru,” Diretór edukasaun Baucau informa ba TATOLI liuhosi telefonika, tersa ne’e.

Preparasaun mak hanesan re-inkrisaun ba estudante, materia hanorin, fasilidade hein sirkulár foun hosi MEJD nasionál kona-ba regra prevensaun covid-19 hodi aplika iha kada ensinu eskolár hotu bainhira hahú prosesu aprendizajen.

Edukasaun Baucau mós sei kolabaora ho servisu munisipál saúde atu fasilita sensibilizasaun inklui partisipasaun estudante iha kampaña vasinasaun tipu Pfizer hodi hasa’e imunizasaun estudante sira molok ativa aula prezensiál.

“Preparasaun la’o hela, agora hein de’it anunsia rezultadu ezame nasionál terseiru báziku tanba presiza rezultadu ezame atu estudante sira hodi re-inkrisaun, entaun ami hein hela, seluk ne’e hahú ona,” Augostu akresenta.

Tuir dadus total eskola iha munisípiu Baucau hahú hosi pré-eskolar, ensinu bazíku, sekundaria no tékniku vokasionál hamutuk 243 no tótal manorin-na’in 2.200-resin.

Jornalista         : Natalino Belo

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here