Prezidente Komisaun A PN, Joaquim dos Santos, Imajen Tatoli/António Gonçalves

DILI, 18 janeiru 2022 (TATOLI)—Prezidente Komisaun A trata asuntu Justisa no Konstituisional, Joaquim dos Santos, hateten atuál Prezidente Parlamentu Nasionál (PPN), Aniceto Longuinhos Guterres Lopes, fó pose ba Prezidente Repúblika (PR) foun mai ne’e iha lejítimu no tuir lei.

Notísia Relevante: Eleisaun ba Prezidente Repúblika sei akontese iha 19 marsu 2022

“Atu ba Prezidente Parlamentu tenke iha eleisaun ida iha Parlamentu Nasionál no momentu bainhira Aniceto Guterres eleitu sai Prezidente Parlamentu Nasionál, votasaun maiória unamidade hosi deputadu sira. Aktu votasaun hili atuál PPN, Aniceto Guterres ho konfiansa polítiku ne’ebé rejimentu mak jere hodi destitui PPN sesante no aktu sira-ne’e públika iha jornál repúblika no Tribunál deklara katak títulu Aniceto Guterres sai Prezidente Parlamentu ne’e legál. Nune’e, ha’u hanoin PPN atu fó pose ba Prezidente Repúblika foun ne’ebé atu mai ne’e lejítimu no tuir konstituisaun ka legál,” Prezidente Komisaun A ne’e hateten ba Agéncia Tatoli iha Parlamentu Nasionál, tersa ne’e.

Tuir konstituisaun RDTL, iha artigu 77  (Simu knaar no juramentu), iha alínea  1 hateten, Prezidente Repúblika sei simu investidura hosi Prezidente Parlamentu Nasionál nian no simu pose, tuir serimónia públika, iha Deputadu no reprezentante órgaun-soberania sira seluk ninia oin.

Alínea 2, Prezidente foun sei simu pose iha loron ikus Prezidente Repúblika tuan ninia mandatu, no Prezidente nia tuur-fatin mamuk hela karik, Prezidente foun sei simu pose iha loron ualu liu tiha loron publikasaun rezultadu eleisaun nian.

Nune’e mós alínea 3 hateten, iha atu-ofisiál investidura, Prezidente Repúblika sei halo juramentu.

Deputadu Fretilin ne’e hateten, Prezidente Parlamentu Nasionál mak fó investidura no prezensa deputadu nian hodi reprezenta povu tanba  podér ne’ebé Prezidente Repúblika hetan sidadaun mak hili, nune’e molok nia kumpre kompromisu eleitorál mak tenke halo juramentu iha povu nia oin.

“Agora se ema ruma kestiona PPN ninia aktu investedura ba PR laiha lejítimidade, sira-nia fundamentu saida. Prezidente Parlamentu bazea artigu 77 imperativu konstituisionál no lei eleitorál ho organika atu halo aktu serimoniál no aktu ne’e públiku signifika tenke marka prezensa iha fatin ne’ebé Prezidente Repúblika atu simu deputadu sira nu’udar reprezentante povu,” nia hateten.

Tanba ne’e, nia hateten, tuir kriteria konstituisionál ne’e léjitimu no labele dehan Prezidente Parlamentu ne’e laiha lejítimidade tanba deskontentamentu polítika, ida-ne’e sei kria konfuzaun ba sidadaun sira.

Notísia Relevante: Re-kandidata an, lei la fó dalan PR rezigna an

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here