Inan-feton ida soru hela Tais Timor iha aldeia Darasula, suku Gariuai, postu administrativu Baucau Vila. Imajen Tatoli/Francisco Sony.

DILI, 18 janeiru 2022 (TATOLI)—Parlamentu Nasional (PN), tersa ne’e liuhosi plenária aprova projetu rezolusaun Parlamentu Nasionál númeru 85/V(4°), institui ‘Loron Nasionál Tais’  ne’ebé Timor-Leste (TL) sei komemora kada tinan iha 14 dezembru.

Notísia Relevante: PN aprova votu kongratulasaun ba “tais” sai patrimóniu mundiál

“Votu a-favór 47, kontra 0 no abstensaun 0, ho nune’e rezolusaun ne’e pasa,” Prezidente Parlamentu Nasionál, Deputadu Aniceto Longuinhos Guterres Lopes, deklara iha plenária Parlamentu Nasionál.

Deputada proponente, Maria Angelina Sarmento, hateten rezolusaun ida-ne’e nu’udar konsensu hosi membru PN nian tanba koñesidu ho loron ida-ne’ebé komite nasionál ba patrimóniu kulturál no materiál hosi UNESCO deside Tais Timor-Leste nu’udar patrimóniu kulturál materiál ne’ebé TL presiza salva guarda ho urjente.

Iha projeitu rezolusaun ne’e Deputadu sira propoin loron 14 dezembru hanesan loron nasionál ba Tais no oinsá fó valorizasaun.

“Ita sei foti desizaun politika ba faze sira-ne’ebé Governu no Estadu presiza opta hahú kedas hosi loron nasionál ba Tais no ita mós husu ba Governu atu kria estratejia nasionál ida oinsá bele promove no valoriza tais iha produtu internu iha nivél nasional,” nia hateten

Nune’e, nia husu ba Governu atu halo polítika ida atu TAIS hanesan matéria ba estudu akadémiku no sientífiku no fó formasaun soru-tais nian ba jerasaun foun sira atu bele iha transferénsia koñesimentu.

Deputada, Maria Borumali Barreto, konsidera Tais hanesan identidade komunidade, família no mós hanesan riku-soin Timor-Leste ninian.

Nia dehan, dalaruma Ita atu haluha maibé agradese ba UNESCO nomós ba organizasaun hotu ne’ebé mak iha ninia misaun atu kontinua promove Tais TL ne’ebé konsege rejistu iha UNESCO sai hanesan patrimoniu kulturál no materiál konesidu iha mundu.

Nia rekomenda ba Governu liuliu Ministéiru Agrikultura no Peska (MAP) tau atensaun ba agrikultór hodi hahú kuda fila-fali kabas hanesan materiál ida ba tais nian.

Notísia Relevante: PN aprova votu kongratulasaun ba “tais” sai patrimóniu mundiál

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here