Eleisaun nu’udar eventu demokrátiku ida hodi povu hili nia reprezentante atu asume kargu públiku ida iha Estadu demokrátiku.

Iha tinan 2022 hanesan tinan polítika ida ba timoroan sira hotu liliu oinsá hili nia prezidente repúblika inklui mós eleisaun parlamentár hodi asume knaar durante tinan lima tuir mandatu konstituisaun.

Tanba ne’e molok atu tama ba eleisaun prezidente repúblika nian Konstituisaun Repúblika Demokrátika Timor-Leste (RDTL) liuhusi artigu 86 fó kbiit ba Prezidente Repúblika marka data eleisaun prezidensiál no lejislativa.

Bazeia ba artigu 12  númeru 1  hosi Lei númeru 7/2006/ 26 dezembru (Lei Eleitorál ba Prezidente Repúblika)  ho alterasaun hirak ne’ebé mak halo ona ba Lei ne’e molok Prezidente Repúblika dekreta data eleisaun prezidensiál tenke rona uluk Governu no mós partidu polítiku sira ho asentu iha Parlamentu Nasionál.

Prezidente Repúblika Francisco Guterres Lú Olo liuhosi Dekretu númeru 2/2022 ne’ebé publika iha loron 15 janeiru ne’e iha Jornal Repúblika marka ona data eleisaun prezidensiál nian hodi hili Prezidente Repúblika ba períodu 2022-2027 iha loron 19 fulan-marsu 2022.

 

Karik rezultadu eleisaun ne’e hatudu katak la iha kandidatu ida mak konsege hetan 50%+1  (métade ho votu ida tan)  hosi númeru total  votus  válidus iha  eleisaun  ne’e ita sei tuir fali eleisaun daruak.  Tuir artigu 12 númeru 2 hosi Lei Eleitorál ba Prezidente Repúblika eleisaun daruak sei halo iha loron tolu-nulu sura hosi loron eleisaun dahuluk. Ba eleisaun daruak ne’e sei la presiza ona iha tan dekretu prezidensiál ba markasaun data eleisaun daruak nian.

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here