Produtu lokál iha Merkadu manleuana, kuarta, (21/07/2021). Imajen TATOLI/António Gonçalves

DILI, 18 janeiru 2022 (TATOLI)–Índise Presu Konsumidór (IPK) hosi grupu hotu iha dezembru 2021 sa’e +0,5% hanesan iha novembru ne’ebé sa’e mós +0,5%.

“Mudansa presu grupu hotu +0,5% tanba kontribuisaun hosi grupu alkohólika no tabaku +1,9%, hahán no bebida la’ós alkolika +0,5%, ekipamentu no manutensaun mobiláriu uma-laran +1,2%, hatais no sepatu +0,5%, no uma +0,1%,” Diretór Jerál Estatístika Ministériu Finansa (MF), Élias dos Santos Ferreira, informa iha ninia knaar fatin, Caicoli, tersa ne’e.

Enkuantu, transporte -0,6% sai hanesan mudansa kontráriu ba inflasaun grupu hotu no grupu hahán no bebida la’ós alkohólika +0,5% tamba hetan kontribuisaun hosi sub-grupu foos +0,7%, mina +0,6%, modo tahan +0,3%, susuben, keiju no manu-tolun +0,8% no na’an +0,6%.

“Aifuan -0,4% sai hanesan mudansa kontráriu ba inflasaun grupu hahán no Bebida la’ós alkohólika,” nia akresenta.

Notísia relevante: IPK marsu sa’e ba 0,7%

Mudansa persentajen IPK anuál sa’e +5,3% kompara entre dezembru 2021 ho dezembru 2020, ne’ebé hetan kontribuisaun hosi grupu hahán no bebida la’ós alkohólika +7,3%, alkohólika no tabaku +10,7%, transporte +6,6%, uma +1,4%, ekipamentu no manutensaun mobiliáriu uma-laran +2,1%, rekreasaun no kultura +1% no saúde +0,7%, hatais no sapatu -0,1% sai hanesan mudansa kontráriu ba anuál dezembru 2021.

Enkuantu, inflasaun tradeable sa’e +0,8% no non-tradeable tun -0,5% iha mensál kompara ho dezembru no novembru 2021. Inflasaun tradeable sa’e +6,4% no non-tradeable sa’e +2,8% iha anuál kompara entre dezembru 2021 dezembru 2020.

“Bainhira haree ba presu ne’ebé mak sa’e no nia mudansa tanba fatór sira hanesan ró sira uluk tama tolu to’o haat maibé agora redús ba ida no fatór seluk mak presu kontentor sa’e hosi $759 ba $1.300 ba kada kontentór, nune’e mós kona-ba mina iha Indonézia rasik, folin mina sa’e tanba ita depende ba importasaun, ne’ebé presu ne’e sa’e iha nasaun importadór maka afeta kedas ba ita-nia presu,” nia esplika.

Presu foos kilograma 25 ne’ebé antes ne’e $12,50, agora sa’e ba $14, kilograma 30 antes $13, agora sa’e ba $17.

“Espera katak presu sira ne’e la’o normál filafali hodi nune’e konsumidór bele asesu. Ida seluk mak presu tabaku no alkohólika sa’e ne’ebé hanesan polítika Governu tanba tabaku estraga ema barak,” nia subliña.

Folin sasán hanesan mina no foos mak sa’e durante dezembru 2021 enkuantu iha novembru laiha mudansa. Kiik liu mak entre modo tahan 0,6% iha novembru tun ba 0,3%, na’an iha novembru no dezembru -0,6%.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here